IýNESKO-nyń shtab-páterinde Qazaqstan Respýblikasynyń Turaqty ókili Jan Ǵalievtiń Uiymnyń Bas direktory Odri Azýlemen kezdesýi ótti, dep habarlaidy QR SIM baspasóz qyzmeti.
Kezdesý aiasynda Elshi IýNESKO-nyń basshysyna Hákimniń 175 jyldyǵyna orai Prezident Qasym-Jomart Toqaevtyń tapsyrmasyna sáikes «Ulttyq aýdarma biýrosy» qoǵamdyq qory Birikken Ulttar Uiymynyń 6 resmi tiline aýdarǵan Abai Qunanbaiulynyń shyǵarmalar jinaqtaryn tabystady.
O.Azýle Q.Toqaevtyń «Abai - rýhani reformator» maqalasyn qyzyǵýshylyqpen oqyp shyqqanyn aitty jáne aqyn, aǵartýshy jáne gýmanisttiń búgingi kúnge deiin ózektiligin joǵaltpaǵan oilarynyń danalyǵy men aýqymdylyǵyna tánti boldy. Sondai-aq, Bas direktor Abai Qunanbaiulynyń adamzat murasyna engen qazaq mádenieti men ádebietiniń damýyna qosqan zor úlesin atap ótti.
Aýdarmashylar eńbeginiń arqasynda Abai sheteldik oqyrmanǵa jaqynyraq jáne túsiniktirek boldy jáne álemniń kóptegen tilderinde «sóiledi».
Sondai-aq, Elshi IýNESKO-nyń shtab-páterine «Sáýkele» sándik pannosyn syiǵa tartty, bul dástúrli bas kiim ejelden beri óziniń ashyqtyǵy men erkindikke degen qushtarlyǵymen sipattalatyn qazaq qoǵamyndaǵy áieldiń qurmetti rólin beineleitinin atap ótti.
Bas direktor «Sáýkele» Uiym hatshylyǵynyń murajaiynan laiyqty oryn tabatynyna sendirdi.
