Áleýmettik jelilerde Qyrǵyzstandaǵy Ystyqkól jaǵalaýynda bolǵan janjaldyń videosy keńinen tarady. Kadrlarda qazaqstandyq týrister men jergilikti turǵyndar arasynda janjal týyndap, sonyń saldarynan jasóspirim qyzdyń jaraqat alǵany kórinedi, dep habarlaidy ult.kz.
Osydan keiin birneshe áiel arasynda janjal ýshyǵyp, tóbeleske ulasqan. Oqiǵa ornynda bolǵan er adamdar olardy ajyratýǵa tyrysqan.
Taǵy bir beinejazbada jerde otyrǵan jaraqat alǵan jasóspirim qyz kórinedi. Jinalǵandar oǵan sý berip, alǵashqy kómek kórsetýge árekettengen. Osy sátte janjalǵa qatysqan áielderdiń bir-birine aýyr sózder aityp, aiqailaǵany baiqalady.
Oqiǵa kýágeri bolǵan Ózbekstan azamatynyń aitýynsha, janjal qoqysqa bailanysty týyndaǵan.
Onyń sózinshe, bir top qyz jaǵajaimen ótip bara jatqan kezde jel ushyrǵan qoqys jaǵalaýda otyrǵan áieldiń janyna túsken. Áiel qoqysty qyzdardan jinaýdy talap etken. Qyzdar qoqystyń ózderine tiesili emes ekenin aitqanymen, ony jinaýǵa qarsy bolmaǵan. Alaida osydan keiin áiel olardy balaǵattap, keiin qyzdardyń biriniń basy men moinynan ustap, kúsh qoldanǵan.
Kýágerdiń aitýynsha, ainaladaǵy adamdar arasha túsýge tyrysqanymen, áiel jasóspirimdi jerge qulatyp, teýip, ura bastaǵan.
Oqiǵa saldarynan qyz miy shaiqalyp, murny synǵan kúide meditsinalyq mekemege jetkizilgeni habarlandy.
Atalǵan oqiǵaǵa qatysty Ystyqkól oblystyq ishki ister basqarmasy pikir bildirdi. Vedomstvonyń málimetinshe, bul derek Ystyqkól aýdandyq ishki ister bóliminde tirkelip, qazirgi ýaqytta sotqa deiingi tekserý júrgizilýde. Quqyq qorǵaý organdary oqiǵanyń barlyq mán-jaiyn anyqtap jatyr.
