Iemenniń ońtústik-batysyndaǵy Aden áýejaiynda sársenbi kúni bolǵan birneshe jarylys pen atystan keminde 27 adam qaza tapty, ondaǵan adam jaraqattandy. Bul týraly Iemen úkimetine silteme jasaǵan Al Hadath basylymy habarlady.
Basylym derekkózderiniń aitýynsha, jaraqat alǵandardyń arasynda ministr orynbasary siiaqty laýazymdaǵy adamdar da bar. Kei derekterge qaraǵanda, áýejaida birneshe jarylys bolǵan, ǵimaratty minometpen atqylaǵan.
Oqiǵa Iemenniń jańa úkimetiniń músheleri Saýd Arabiiasynan elge oralyp, áýejaiǵa qonyp jatqan sátte boldy. Beinekadrlardan áýejaida adamdardyń ábigerge túskeni, ǵimarattyń ústinen tútin shyǵyp jatqany baiqalady. Ázirge jarylysqa jaýapkershilikgi eshkim moinyna alǵan joq.
Iemen sport ministriniń orynbasary Hamza ál-Kamali bul shabýyldy hýsit jasaqtary uiymdastyrǵan bolýy múmkin degen boljam aitty.
Jeltoqsanda Iemen prezidenti Abd Rabbo Mansur Hadi eldiń jańa úkimetin qurý týraly jarlyq shyǵarǵan. Iemendegi qarýly qaqtyǵys 2014 jylǵy naýryzdan beri júrip jatyr. Saýd Arabiiasy bastaǵan arab koalitsiiasy eldiń bir bóligin baqylaýda ustap otyrǵan hýsittermen kúreste Abda Rabbo Mansur Hadidiń áskerine qoldaý bildirip keledi. Batysta búlikshilerdi Iran qoldap otyr degen boljam bar.
Saýd Arabiiasynyń qoldaýymen ótken uzaqqa sozylǵan bilikti bólisý jónindegi kelissózderden soń Iemenniń jańa úkimeti 26 jeltoqsanda ant qabyldaǵan.
