Foto: Ashyq derekkózden
Belgili saiasattanýshy Dosym Sátpaev reseilik propagandist Vladimir Solovevtiń Ortalyq Aziia týraly jaqynda aitqan sózine pikir bildirip, qazirgi almaǵaiyp kezeńdi Ortalyq Aziia elderiniń barlyǵyna qarýyn sailap otyrýy kerek dep esepteitinin jetkizdi. Bul týraly Ult.kz habarlaidy.
Jaqynda Reseidiń bas propagandisteriniń biri Vladimir Solovev «Halyqaralyq quqyq pen tártipke túkirgenimiz bar», — dep málimdep, Ortalyq Aziiany «bizdiń aimaq» dep, AQSh-tyń Venesýelada qoldanǵan tásilin úlgi etýge úndedi.
Solovevtiń aitýynsha, Resei eń aldymen ózine jaqyn memleketterge basymdyq berýi tiis. Onyń pikirinshe, Armeniia men Ortalyq Aziia Reseidiń yqpal etý keńistigine jatady.
Ol ulttyq qaýipsizdik máselesin alǵa tartyp, Ýkrainada «arnaiy áskeri operatsiia» bastaý múmkin bolsa, dál osyndai sebeppen yqpal aimaǵyndaǵy ózge óńirlerde de sondai qadamǵa barýǵa nege bolmaidy degen saýal tastady.
Bul málimdemege Armeniia biligi qatty narazylyq bildirip, ony eldiń egemendigine tóngen qaýip retinde baǵalady. Armeniianyń Syrtqy ister ministrligi Reseidiń Erevandaǵy elshisin shaqyryp, resmi nota tabystady. Al Ortalyq Aziia memleketteri atalǵan sózderge qatysty ázirge resmi ustanymyn bildirgen joq.
Osy másele boiynsha saiasattanýshy Dosym Sátpaev áleýmettik jeli paraqshasynda jazba jariialady.
"Jaqynda Pýtinnen áldebir eńbegi úshin medal alǵan propagandist Solovev kenet ózin generalissimýs sezinip, tutas Ortalyq Aziiaǵa ses kórsete bastapty. Ol óz sózinde Ortalyq Aziiany «biz yqpal etetin aimaq» dep, yqpaldy kúsheitý úshin qatań stsenarii de múmkin ekenin jetkizedi. Osyndai araǵa ot salatyn málimdemeleri úshin de ony marapattaityn bolyp tur ǵoi. Saiqymazaqtyń aýzyndaǵy sóz ‒ patsha men onyń mańaiyndaǵylardyń oiynda bolýy múmkin. Al bizdiń SIM, depýtattar men QHA-nyń aýyzdaryna qum quiylǵandai.
Eger Solovevtiń sózinshe halyqaralyq quqyqtarǵa qoldy bir silteý kerek bolsa, onda kórshilerge de ses kórsetýge bolady. Mundai jaǵdaida UQShU-nyń da keregi joq, sebebi onda ujym músheleriniń bir birine shabýyl jasaýyna bolmaidy dep resmi túrde jazylǵan. Iaǵni ol óz sózimen bul uiymnan shyǵý kerektigin rastady. Aitpaqshy, Ózbekstan men Armeniia ujymǵa múshelikten eshqandai qaýipsizdikke kepil kórmeitinin aityp, múshe bolýdy toqtatý kerektigin erte jáne ýaqytyly túsindi.
Ne dese de Ortalyq Aziianyń barlyq elderi halyqaralyq quqyqtyń jahandyq daǵdarysy jaǵdaiynda, oǵan Tramptyń da belgili bir deńgeide yqpal etkenin eskere otyryp, iadrolyq qarýy joq birde-bir memleket endi ózin tolyq qaýipsiz sezine almaitynyna daiyn bolýy tiis degen fakt bar.
Qasqyrlar, shibóriler men qoilardyń zamany kelip jetti. Negizinde, adamzat tarihynyń basym bóliginde dál osylai bolǵan: álemdi birneshe imperiia óz úlesine bólip alǵan bálishke uqsap keldi. Ol kezeńde ózge memleketter úshin egemendik uǵymy shartty ǵana boldy. Tarih tsikldik sipatqa ie. Qazir ol geosaiasi turaqsyzdyqtyń úirenshikti kezeńine qaita oralyp otyr. Sondyqtan qazir Ortalyq Aziia elderiniń barlyǵyna qarýyn sailap otyrýy kerek. Qorǵanys qabiletin kúsheitý qajet. Saiasi institýttar men memlekettik qurylymdardyń jumys sapasyn arttyrý arqyly saiasi júieni nyǵaitý kerek. Halyqtyń ál-aýqatyn ósirý jáne basqa elderge táýeldilikti azaitý úshin neǵurlym tiimdi ekonomikalyq reformalar júrgizý qajet. Munyń barlyǵy bilik pen qoǵam arasynda senim daǵdarysy týyndamaýy úshin qajet, óitkeni kez kelgen ekonomikalyq nemese saiasi daǵdarys syrtqy aralasýǵa árdaiym qolaily múmkindik týdyrady. Alaida «qajet» degen talap tym kóp, al ókinishke qarai, ýaqyttyń tym az qalǵany qazirdiń ózinde anyq baiqalady", - dedi D. Sátpaev.
Aita keteiik, reseilik propagandister ásirese Qazaqstanǵa qatysty ses kórsetetin, qoqan-loqyǵa uqsas málimdemelerdi mezgil-mezgil jasap turady. Mundai ritorika qoǵamda alańdaýshylyq týǵyzady.
