Qytai astanasy Beijiń qalasynda ótken 2022 jylǵy XIII qysqy Paralimpiada oiyndary resmi túrde jabyldy, dep habarlaidy QazAqparat.
Saltanatty sporttyq shara «Qus uiasy» dep atalatyn ulttyq stadionynda ótkizildi.
Álemniń 46 elinen kelgen 564 saiysqa qatysýshy sporttyń shańǵy jarysynan, biatlonnan, taý shańǵysy sportynan, sledj-hokkeiden, arbadaǵy kerlingten jáne snoýbord sekildi sporttyń alty túrinen 78 júldeni sarapqa saldy.
Eske salsaq, aitýly alamanda elimizdiń atynan Erbol Hamitov, Aleksandr Gerlits, Denis Petrenko, Iýrii Berezin jáne Sergei Ýsoltsev para shańǵy jáne para biatlon sport túrlerinen el namysyn qorǵady.
Olardyń arasynan para biatlonnan túregep syrǵanaýda Aleksandr Gerlits qola júldeger atandy.
Medaldar kestesinde Qazaqstan Aýstraliia jáne Shveitsariiamen birge 17-orynǵa jaiǵasty. Qytai komandasy – birinshi orynda, ýkrainalyqtar – ekinshi orynda, al Kanada úzdik úshtikti túiindedi.
Qazaqstan sportshylary Paralimpiada oiyndaryna 1994 jyldan beri turaqty túrde qatysyp keledi.
Búgingi kúnge deiin el qorjynyna 1 altyn, 1 kúmis medal tústi. 1994 jyly 10 shaqyrymǵa klassikalyq mánerde shańǵy jarysynda qazaqstandyq Liýbov Vorobeva kúmis alsa. 2018 jyly shańǵymen jarysta Aleksandr Koliadin 1,5 shaqyrymǵa klassikalyq mánerde sprint jarysynda chempion atandy.
Endi XIV qysqy Paralimpiada oiyndary Italiianyń Milane jáne Kortina-d’Ampetstso qalalarynda 2026 jyldyń 6-15 naýryz kúnderi ótkiziledi.
