Foto: RBK
Wildberries qazaqstandyq kásipkerlerge salynǵan milliondaǵan aiyppulǵa qatysty pikir bildirdi, - dep habarlaidy Tengrinews.kz saity.
"Shynymen de qazaqstandyq keibir kásipkerlerge salynatyn tólemde tehnikalyq qatelik boldy. Qaita esepteý týraly habar 2023 jyldyń 13 naýryzynda bizdiń saitta aldyn ala jariialanǵan bolatyn.
Qate esepteýler joiylady jáne 2023 jyldyń 20 naýryzynda iske asyrý týraly esepterinde kórsetiledi. Biz satýshylarǵa qoldaý kórsetý qyzmetin kúsheitemiz, olarǵa keri bailanys ornatyp, platformamyzben jumys isteý sharttary týraly suraqtaryna jaýap beremiz. Olardan qazirgi jaǵdai úshin keshirim suraimyz", - deidi Wildberries ókilderi.
Bul oqiǵaǵa Saýda jáne integratsiia ministrligi de túsinikteme berdi.
2022 jyly Saýda jáne integratsiia ministrliginiń Tutynýshylardyń quqyqtaryn qorǵaý komitetine Wildberries-ge qatysty jalpy somasy shamamen 14 million teńgeni quraityn 450-den astam shaǵym men ótinish kelip túsken. Tiisinshe 11 million teńge bolatyn 390-nan astam ótinish qanaǵattandyrylǵan.
"2022 jylǵy 7 jeltoqsanda TMD tutynýshylarynyń quqyqtaryn qorǵaý jónindegi Konsýltativtik keńestiń kezekti otyrysynda taqyryptardyń biri elektrondy kommertsiianyń problemalyq máselelerine, sonyń ishinde Wildberries jáne OZON platformalaryna arnaldy, onda problemalyq máseleler komitet tarapynan aityldy", - dedi komitet.
Vedomstvo tutynýshylardyń problemalyq máselelerin jedel sheshý úshin Wildberries platformasynyń ókilderimen kelisim ornatatyn jumys toby qurylǵanyn qosty.
"Kásipkerlerdiń quqyqtaryn qorǵaýǵa keletin bolsaq, vedomstvo Ulttyq kásipkerler palatasymen, basqa da memlekettik organdarmen jáne birlestiktermen birlesip, zańnamaǵa ózgerister men tolyqtyrýlar engizý boiynsha jumys júrgizilip jatyr", - dep qorytyndylady vedomstvo.
