Jeke derekterdi qorǵaý maqsatynda Ishki ister ministrligi WhatsApp messendjerindegi akkaýnttarǵa ruqsatsyz kirý jaǵdailary tirkelip jatqanyn eskertedi, dep habarlaidy Polisia.kz-ke silteme jasap ult.kz.
Akkaýnttyń qaýipsizdigin kúsheitý úshin QR IIM eki satyly tekserýdi qosýdy usynady. Ol úshin WhatsApp qosymshasyn ashyp, «Baptaýlar» bólimine kirińiz. Odan keiin «Akkaýnt», «Eki satyly tekserý» bólimin tańdap, «Qosý» batyrmasyn basyńyz. Alty tańbaly PIN-kod ornatyp, akkaýntqa kirý múmkindigin qalpyna keltirý úshin elektrondyq poshta mekenjaiyn kórsetińiz. Ornatylǵan PIN-kodty eshkimge aitpańyz.
Sondai-aq akkaýntqa qosylǵan qurylǵylardy únemi tekserip otyrý qajet. Ol úshin joǵarǵy oń jaq buryshtaǵy úsh núkte belgisin basyp, «Bailanystyrylǵan qurylǵylar» bólimine kirip, tizimdi qarap shyǵyńyz. Beitanys qurylǵy anyqtalsa, ony tańdap, «Shyǵý» batyrmasyn basyp, oǵan berilgen qoljetimdilikti óshirińiz.
Akkaýnttyń buzylǵan bolýy múmkin ekenin myna belgilerden baiqaýǵa bolady:
– belgisiz qurylǵylardyń akkaýntqa qosylýy;
– sizdiń qatysýyńyzsyz habarlamalardyń jiberilýi;
– tanystaryńyzdyń sizdiń atyńyzdan kúmándi ótinishter kelgenin habarlaýy;
– ózińiz suratpaǵan rastaý kody bar SMS-habarlamanyń kelýi;
– akkaýnttan ózdiginen shyǵyp qalý.
Rastaý kodtaryn úshinshi tulǵalarǵa bermeńiz, kúmándi siltemelerge ótpeńiz jáne beitanys adamdardyń nusqaýymen bógde qosymshalardy ornatpańyz.
Akkaýnttyń buzylǵanyn kórsetetin belgiler anyqtalǵan jaǵdaida ony qorǵaý úshin dereý sharalar qabyldap, quqyq qorǵaý organdaryna júginý qajet.
WhatsApp-ta ruqsatsyz áreketter anyqtalǵan jaǵdaida «Bailanystyrylǵan qurylǵylar» bólimindegi barlyq belsendi seanstardy dereý aiaqtap, eki satyly tekserý PIN-kodyn ózgertińiz. Sondai-aq akkaýnttyń buzylýy múmkin ekenin óz bailanystaryńyzǵa eskertińiz.
QR IIM smartfon men kompiýterdi ziiandy baǵdarlamalardyń bar-joǵyna tekserýdi, sondai-aq SMS nemese messendjer arqyly kelgen rastaý kodtaryn úshinshi tulǵalarǵa bermeýdi usynady.
QR IIM eskertedi: eger tanysyńyzdan aqsha aýdarýdy shuǵyl suraǵan habarlama kelse, mindetti túrde oǵan telefon arqyly nemese basqa jolmen habarlasyp, bul habarlamany shynymen akkaýnt iesi jibergenine kóz jetkizińiz.
