9 jeltoqsanda Búkilálemdik dopingke qarsy agenttiktiń (WADA) atqarý komiteti Reseidi tórt jylǵa olimpiada oiyndary men álem chempionattarynan shekteýdi usyndy.
WADA usynysyna sai, Resei osy aralyqta halyqaralyq jarystar uiymdastyra almaidy.
«Komitettiń bul usynysy bir aýyzdan maquldandy» dep málimdedi WADA.
Resei antidoping agenttiginiń basshysy Iýrii Ganýs reseilik aqparat agenttikterine WADA sheshimin rastady.
WADA usynysyna sai, Resei sportshylary 2020 jyly ótetin Tokio jazǵy olimpiadasyna jáne 2022 jylǵy Pekin qysqy olimpiadasyna neitral statýsynda qatysady. Eger sportshy jeńiske jetse, Resei ánurany oinamaidy, el týy kóterilmeidi. Budan bólek, Reseidiń barlyq resmi ókilderi men sheneýnikteri jarystardan shettetiledi.
WADA sheshimi tek usynys, bul qujatty Halyqaralyq olimpiada komiteti (HOK), FIFA (Búkilálemdik fýtbol federatsiiasy) jáne UEFA (Eýropa fýtbol qaýymdastyǵy) qabyldamaýy da múmkin.
RESEI NE ÚShIN JAZALANDY?
WADA «Resei biligi 2014 jylǵy Sochi olimpiadasynda jáne el aýmaǵynda ótken basqa jarystarda reseilik sportshylardyń doping synamalaryn almastyrdy» dep aiyptaidy. Dopingke qarsy halyqaralyq uiym «Resei biligi doping erejelerin buzýǵa atsalysty» dep sanaidy. Máskeý bul aiyptaýlardyń barlyǵyn joqqa shyǵarady.
2016 jyly WADA esep jariialap, «2014 jylǵy Sochi olimpiadasynda Resei sportshylary doping qoldanǵan, al reseilik sheneýnikter ony jasyrǵan» málimdedi.
Budan bólek, Máskeý antidoping zerthanasynyń burynǵy jetekshisi Grigorii Rodchenko Sochi olimpiadasynan keiin AQSh-qa qashyp, sol jaqta jýrnalisterge Reseidiń doping erejesin buzǵany jaily suhbat bergen.
Rodchenko málimdemesinde Sochi olimpiadasy kezinde reseilik sportshylarǵa doping bergenin, zerthana qyzmetkerleri doping analizderin «taza» synamalarmen aýystyrǵanyn aitqan.
WADA keiin Sochi olimpiadasynda medal alǵan reseilik 12 sportshynyń doping synamalary qaita ashylǵanyn, Sochi paralimpiadasyna qatysqan reseilik alty atlettiń doping analizderiniń almastyrylǵanyn dáleldegen.
Kreml bul derekterdiń bárin moiyndamaǵan. Resei prezidenti Vladimir Pýtin WADA esebin «qoldan jasalǵan» degen.
WADA esebiniń negizinde Resei 2016 jyly Rioda ótken paralimpiada oiyndarynan shettetilgen. Al 2018 jylǵy Phenchhanda (Ońtústik Koreia) ótken qysqy olimpiadaǵa Resei sportshy «beitarap atlet statýsynda» qatysty.
2018 jyly WADA Máskeý antidoping zerthanasynyń doping synamalaryn derekter bazasyn tekserip, «myńdaǵan doping synamalarynyń almastyrylǵanyn» anyqtaǵan. Kreml bul tekserýge de mardymdy jaýap bere almady.
Osy tekseristen keiin WADA Reseidi taǵy da tórt jylǵa olimpiada men álem chempionattarynan shekteýdi usynyp otyr.
