Búgin Astanada Jastar jylynyń ashylýyna arnalǵan sharada Qazaqstandaǵy eń jas stýdent Abzal Myrzash QR Prezidenti Nursultan Nazarbaevqa aldaǵy josparlary týraly aityp berdi, dep habarlaidy QazAqparat.
«Men de elimizdiń shynaiy patrioty retinde Qazaqstannyń aldyńǵy qatarly ozyq tehnologiiasy bar, ǵylymy men ekonomikasy damyǵan órkenietti 30 eldiń qatarynda bolýyna óz úlesimdi qosqym keledi. Sondyqtan aldaǵy ýaqytta Qazaq-Britan tehnikalyq ýniversitetin bitirgen soń, AQSh-taǵy Massachýsets tehnologiia institýtynyń magistratýrasynda jáne doktorantýrasynda oqýdy jalǵastyryp, aqparattyq tehnologiiamen birge, nanotehnologiiany meńgerip, Qazaqstannyń ǵylymyna óz úlesimdi qosamyn degen úlken maqsatym bar», - dedi Abzal Myrzash.
Sonymen qatar ol elimizde kompiýterlik tehnikany jáne ony jabdyqtaityn quraldardy, robototehnikany, nanorobottardy jasaityn úlken kásiporyn ashýǵa nietti ekenin aitty.
«Qurmetti Nursultan Ábishuly! Siz únemi latyn qarpine kóshý týraly aityp kelesiz. Óikeni latyn álipbiine kóshý - IT-tehnologiialyq progresten qalys qalmaýǵa, eń bastysy, qazaq tilin jańǵyrtýǵa jaǵdai týǵyzady. Sondyqtan usynatyn eki jobam bar. Birinshi jobamda kompiýterdiń pernetaqtasyna yńǵailap «Abzal alfavit» dep atalatyn qazaq-latyn álipbiin jasadym. Osy nusqama avtorlyq kýálik aldym. Meniń bul nusqam arqyly álemniń kez kelgen jerinen kompiýterdiń standartty aǵylshyn pernetaqtasyn paidalanyp, qazaqsha jazýǵa bolady», - dedi A. Myrzash.
Onyń sózine qaraǵanda, ekinshi jobada kirillitsadan latyn qarpine aýdaratyn konverter baǵdarlama jasaldy.
«Qazir meniń konverter baǵdarlamam arqyly kirillitsadan latyn grafikasyndaǵy qazaq qarpine 1 minýtta 1 200-den astam kitap aýdarýǵa bolady», - dedi výnderkind.
Budan buryn habarlanǵandai, Qazaqstandaǵy eń jas stýdent Abzal Myrzash Qazaq-Britan tehnikalyq ýniversitetinde bilim alyp jatyr.
Oqý ornynyń basshylyǵy, bazalyq fakýltet dekanaty, aqparattyq tehnologiialar dekanaty jas stýdentti jiti baqylaýǵa alǵan.
.jpeg)