Búgin Almaty qalasynyń Almaly aýdandyq sotynda «QazTransGaz» AQ bas direktorynyń burynǵy keńesshisi ári «Nur Otan» partiiasynyń eks-ideology Sanjar Boqaevqa, onyń jieni Madiiar Qalmenovke jáne jeke mobilografy Ulan Núsipqojaǵa qatysty qylmystyq is boiynsha kezekti sot otyrysy bastaldy.
Aldyńǵy sot otyrysynda memlekettik aiyptaýshy kúdiktiniń kinási boiynsha aktini jariialaǵan bolatyn. Sanjar Boqaevqa Qazaqstan Respýblikasy Qylmystyq kodeksiniń bes baby boiynsha aiyp taǵylǵan. Atap aitqanda, asa iri mólsherdegi alaiaqtyq (190-bap), qylmystyq jolmen alynǵan aqshany zańdastyrý (218-bap), urlyq (188-bap), aǵashtardy zańsyz kesý (340-bap) jáne kórineý jalǵan aqparat taratý (274-bap). Al onyń jieni Madiiar Qalmenovke alaiaqtyq jáne qylmystyq jolmen alynǵan kiristerdi zańdastyrý, al mobilograf Ulan Núsipqojaǵa urlyq, aǵashtardy zańsyz kesý jáne kórineý jalǵan aqparat taratý aiyptary taǵylǵan.
Aiyptaýdyń negizgi epizodtarynyń biri 42 million teńgeden astam qarajatty jymqyrýǵa qatysty. Prokýratýra nusqasy boiynsha, 2018 jyly Boqaev pen Qalmenov «QazTransGaz» kompaniiasynyń kásipodaǵy úshin gazmotorly tehnika qatysatyn avtokerýen ótkizýge bólingen qarajatty shyǵaryp alý shemasyn uiymdastyrǵan.
Aldyńǵy sot otyrysynda jariialanǵan málimetterge sáikes, S.Boqaev óziniń baqylaýyndaǵy kásiporyndy jieniniń atyna qaita rásimdeýdi usynǵan. Osydan keiin is-sharanyń qarajat esebine negizsiz kóterilgen shyǵyndar men is júzinde kórsetilmegen qyzmetter engizilgen. Smetanyń jalpy somasy 86 million teńgeni quraǵan. Aiyptaý tarapynyń málimetinshe, onyń 42 million teńgeden astamy jymqyrylǵan. Memlekettik aiyptaýshynyń paiymdaýynsha, keiin bul qarajat Astanadaǵy jihaz óndirisiniń jaldaý aqysyn tóleý, jabdyq satyp alý jáne ózge de qarjylyq operatsiialarǵa jumsalý jolymen zańdastyrylǵan.
Taǵy bir epizod qoldan uiymdastyrylǵan qylmystyq áreketterge qatysty. Mundai zańǵa qaishy áreketterge kúdiktiler áleýmettik jelilerge arnalǵan beinematerialdar túsirý maqsatynda barǵan. Memlekettik aiyptaý nusqasyna sáikes, Boqaev pen onyń mobilografy ózderi uiymdastyrǵan quqyqbuzýshylyqtardy jai ǵana túsirip qoimai, keiin materialdy qoǵamda rezonans týdyrý úshin paidalanǵan.
Atap aitqanda, prokýrordyń málimdeýinshe, aiyptalýshylar Úlken Almaty ózeniniń jaǵalaýyn qaita jańǵyrtýǵa arnalǵan nysannan 12 granit taqtany urlaýdy uiymdastyrǵan. Oqiǵa beinekameraǵa túsirilip, keiin beinejazba áleýmettik jelilerde merdigerler men ákimdik qyzmetkerleriniń zańsyz áreketterin áshkereleitin material retinde taratylǵan.
Osyǵan uqsas aiyptaýlardyń ishinde Baýma toǵaiyndaǵy zańsyz kesilgen aǵashtar da bar. 16 aǵashty kesken nemese zaqymdaǵan oryndaýshylarǵa aqshalai syiaqy berilgen. Budan keiin is figýranttary aǵashtardyń zańsyz kesilgenin ózderi anyqtaǵandai kórinis jasap, bolǵan oqiǵany kezekti áshkereleý retinde usynǵan.
