Jýrnalist Janat Moldashova Ádilhan esimdi qariianyń densaýlyǵy nasharlap, este saqtaý qabileti tómendegenin habarlady. Onyń aitýynsha, qariiaǵa qatysty is boiynsha sot protsesi bastalǵaly jatyr. Alaida qart kisi qazir basynan ótken jaittardy baiandap bere almaidy, dep habarlaidy ult.kz.

Jýrnalist Instagram paraqshasynda Ádilhan atamen jazda kezdesip, áńgimeleskenin jazdy. Sol kezde qalaǵa arnaiy kelgen qariia óz jaǵdaiyn egjei-tegjei aityp, kózine jas alǵan.

"Qarnymnyń ashqanyna emes, qadirimniń qashqanyna jylaimyn” degen osy. Eń ókinishtisi, Ádilhan ata bárin umytqan. Qairan áke, jazda qalaǵa kelip, jylap otyryp bárin egjei-tegjei aityp bergen edi. Endi sot bastalady. Biraq ózi sóilei almaidy. Densaýlyǵy nasharlap, jady óshken",  – dep jazdy Janat Moldashova.

Jýrnalistiń jazbasyna qaraǵanda, sol kezdesýden keiin qariianyń jaǵdaiy nasharlaǵan. Ol Ádilhan atanyń sot qarsańynda óz basynan ótken oqiǵalardy aityp bere almai otyrǵanyna alańdaýshylyq bildirdi.

Aita keteiik, Qart ákesin tamaqtandyrǵan er adam jelidegilerdi tánti etti.

Ne jaǵdai boldy? 

Áńgime Atyraý oblysy Qyzylqoǵa aýdanynyń Saǵyz aýylynda turǵan Ádilhan Sisenov týraly. Qariia buǵan deiin kenje uly ózin uryp-soǵyp, skotchpen bailap, úiden shyǵarmai qoiǵanyn aityp, politsiiaǵa shaǵymdanǵan. Onyń sózinshe, janjal 15 myń teńgege bailanysty shyqqan.

Aqsaqaldyń aitýynsha, balasy oǵan birneshe ret qol kóterip, as-sý bermegen. Túnde qariia tereze arqyly syrtqa shyǵyp, qaryndasynyń úiine barǵan. Qaryndasy Kenjetai Sisenova da aǵasynyń buǵan deiin qorlyq kórgenin aitqan. Politsiia ókili 19 maýsymda «uryp-soǵý» deregi boiynsha qylmystyq is qozǵalǵanyn rastaǵan. Keiin qariiany ózge perzenti úiine alyp ketken.