Aldaǵy ýaqytta qaiyrymdylyq jáne volonterlik jónindegi zań jobalaryn jetildirý josparda bar. Bul týraly QR Aqparat jáne qoǵamdyq damý ministri Aida Balaeva málim etti, dep habarlaidy QazAqparat.
«Árine, azamattyq qoǵammen bailanys ornatý – ministrlik quzyryndaǵy negizgi salalardyń biri. Bul rette, 2020 jyly 27 tamyzda Memleket basshysynyń jarlyǵymen Azamattyq qoǵamdy damytý tujyrymdamasy qabyldandy. Atalǵan qujat elimizdegi azamattyq sektordy damytýdyń aldaǵy on jylǵa arnalǵan negizgi strategiialyq baǵyttaryn aiqyndaidy. Onyń úlken bir bólimi – bul sapaly zań shyǵarý. Bul rette, ózderińiz bilesizder, qoǵamdyq keńesterdiń múmkindigin keńeitetin jáne mundai Keńesterdi kvazimemlekettik sektorda da qurýdy mindetteitin Zańǵa qol qoiyldy. Búginde «Qoǵamdyq baqylaý týraly» jańa zań jobasy men oǵan ilespe «onlain-petitsiia» týraly tolyqtyrýlar qoǵamda qyzý talqydan ótip jatyr», - dedi A. Balaeva ministrliktiń keńeitilgen alqa májilisinde.
Onyń aitýynsha, aldaǵy ýaqytta qaiyrymdylyq jáne volonterlik jónindegi zań jobalaryn jetildirý josparda bar.
«Ózderińiz kýá boldyńyzdar, Prezident bastamasymen jariialanǵan «Volonterler jyly» – eriktiler qozǵalysynyń damýyna tyń serpin bergen jasampaz joba boldy. Sondyqtan da, el Prezidenti Úkimetke bul jumysty turaqty túrde jalǵastyrýdy tapsyrdy. Qazir arnaiy Jol kartasy jasaqtalyp, iske asýǵa daiyn. Munyń ózi - «Volonterlik» uǵymnyń aýqymy keń jáne ol bir jylmen nemese bir joba aiasynda ǵana shektelmeitindigin kórsetedi», - dedi ministr.
