Túrkistan oblysy ákimdiginiń qoldaýymen oblys ortalyǵyndaǵy «Kongress Holl» kópsalaly keshenide 19-20 qazan kúnderi Túrkistan oblystyq mádeniet basqarmasy Halyqaralyq «Voice of Turan» qazaq ánderi baiqaýyn ótkizedi. Mádeni-mýzykalyq jańalyq sanalatyn baiqaý biyl alǵash ret oflain túrde ótkiziledi. Bul týraly búgin óńirlik komýnikatsiia qyzmetinde ótken brifingte Túrkistan oblysy mádeniet basqarmasynyń basshysy Ázimhan Qoilybaev aitty.
Festivalge Túrkiia, Ózbekstan, Qyrǵyzstan, Tatarstan, Ázirbaijan, Polsha, Chernogoriia, Belarýs, Moldova, Grýziia, Serbiia, Qarashai-Sherkes respýblikasy, Býriatiia, Makedoniia, Bolgariia memleketterinen 18-35 jas aralyǵyndaǵy estradalyq janrdaǵy oryndaýshylar qatysady.
«Biylǵy baiqaýdyń ereksheligi, Aziia elderinen ǵana emes, Eýropa memleketterinen de ánshiler kelip qatysýda. Baiqaýǵa qatysýshy sheteldik ónerpazdar qazirgi tańda Túrkistan óńirine kelip, daiyndyqtaryn júrgizýde. Baiqaý osydan eki jyl buryn bastaý alyp, karantindik sharalarǵa bailanysty onlain túrde ótti. Baiqaý qazaq mýzykasy men qazaqstandyq kompozitorlardyń úzdik shyǵarmalaryn, sondai-aq qazaq ánderin álemge nasihattaý, shyǵarmashyl daryndy jastardy anyqtaý jáne olarǵa qoldaý kórsetý maqsatynda uiymdastyrylyp jatyr», – dedi Ázimhan Qoilybaev.
Halyqaralyq baiqaýda shyǵarmashylyq intelligentsiia ókilderi, tanymal oryndaýshylar, kompozitorlar, prodiýserlerden quralǵan kásibi qazylar alqasy tórelik etedi. Jeńimpazdar Gran-pri, Birinshi, ekinshi jáne úshinshi dárejeli laýreat, sonymen qatar túrli nominatsiia boiynsha arnaiy diplommen jáne qarjylai syilyqtarmen marapattalady.
Jobanyń bas prodiýseri, oblystyq mádeniet jáne halyq shyǵarmashylyǵy ortalyǵynyń direktory Meiirjan Aliakbarovtyń aitýynsha, qatysýshylardyń barlyǵy úlken kontserttik qoiylymdarda tájiribesi bar, respýblikalyq, ulttyq, jáne halyqaralyq án baiqaýlarynda jetistikke jetken úmitkerler.
Aita ketsek, buǵan deiin atalmysh baiqaýda 2020 jyly Maldova respýblikasynan Galina Shkoda bas júldeni jeńip alsa, 2021 jyly Býriatiialyq Tsyden Eshi Bimbaev Gran-pri iegeri atanǵan. Halyqaralyq án saiynyń nátijesinde 4 eldiń úzdik ánshilerinen qurylǵan «Turan Boys» kvarteti búginde qazaq ánderin nasihattaýda zor úles qosyp júr.
