Ýkraina prezidenti Vladimir Zelenskii seisenbi kúni BUU Qaýipsizdik keńesinde sóz sóiledi. 24 aqpanda Resei Ýkrainaǵa basyp kirgeli beri ol Qaýipsizdik keńesiniń otyrystaryna qatyspaǵan, dep habarlaidy Azattyq.
Ýkraina prezidenti Qaýipsizdik keńes múshelerin Resei áskeriniń Ýkraina aýmaǵynda jasaǵan qylmystary úshin jaýapqa tartýǵa shaqyrdy. Sondai-aq, Ýkrain basshysy Kiev túbindegi Býcha qalasyndaǵy jantúrshigerlik oqiǵalar týraly aityp berdi. "Kimder ekenin anyqtap jatpastan otbasylardy túgeldei qyrǵan", dedi Zelenskii.
"Býchada qylmys ataýlynyń bári jasalǵan. Olar qart kisilerdi de, balalardy da óltirgen, tipti adam órteýge talpynǵan. Turǵyndardy kóshede atqan, úide óltirgen, olardy tankilermen taptaǵan, áielderdi zorlaǵan, balalardyń kózinshe óltirgen. Olar eldi úiindige ainaldyryp jatyr", - dedi Ýkraina Prezidenti.
Buǵan qosa, Zelenskii "agressor azyq-túlik daǵdarysynyń da týyndaýyna yqpal etkenin, sonyń saldarynan Afrika men Aziiada ashtyq bolatynyn" aitty.
Ýkraina prezidenti Býchadaǵy qyrǵyndy Ekinshi dúniejúzilik soǵystan bergi "eń jantúrshigerlik áskeri qylmys" dep atady.
Reseidiń halyqaralyq uiymdaǵy turaqty ókili Vasilii Nebenzia BUU Qaýipsizdik keńesiniń seisenbidegi otyrysynda Resei Ýkrainadaǵy "azamattyq nysandarǵa soqqy jasamaidy, beibit turǵyndardy qorǵaidy" dep málimdedi.
Resei áskeri tastap ketken Býcha qalasynda ondaǵan máiit shashylyp jatty, olardyń keibiriniń qoly bailanǵany anyqtaldy. Buǵan qosa, qalada adamdardy bir orynǵa jappai kómgeni málim boldy. Ýkrain biligi Býchada 300-den astam beibit turǵyn reseilik jaýyngerler qolynan mert boldy dep málimdedi.
Resei biligi Býchada beibit turǵyndardy óltirdi degen aiyptaýlardy joqqa shyǵaryp otyr.
