ۋكراينا پرەزيدەنتٸ ۆلاديمير زەلەنسكيي سەيسەنبٸ كٷنٸ بۇۇ قاۋٸپسٸزدٸك كەڭەسٸندە سٶز سٶيلەدٸ. 24 اقپاندا رەسەي ۋكرايناعا باسىپ كٸرگەلٸ بەرٸ ول قاۋٸپسٸزدٸك كەڭەسٸنٸڭ وتىرىستارىنا قاتىسپاعان, دەپ حابارلايدى ازاتتىق.
ۋكراينا پرەزيدەنتٸ قاۋٸپسٸزدٸك كەڭەس مٷشەلەرٸن رەسەي ەسكەرٸنٸڭ ۋكراينا اۋماعىندا جاساعان قىلمىستارى ٷشٸن جاۋاپقا تارتۋعا شاقىردى. سونداي-اق, ۋكراين باسشىسى كيەۆ تٷبٸندەگٸ بۋچا قالاسىنداعى جانتٷرشٸگەرلٸك وقيعالار تۋرالى ايتىپ بەردٸ. "كٸمدەر ەكەنٸن انىقتاپ جاتپاستان وتباسىلاردى تٷگەلدەي قىرعان", دەدٸ زەلەنسكيي.
"بۋچادا قىلمىس اتاۋلىنىڭ بەرٸ جاسالعان. ولار قارت كٸسٸلەردٸ دە, بالالاردى دا ٶلتٸرگەن, تٸپتٸ ادام ٶرتەۋگە تالپىنعان. تۇرعىنداردى كٶشەدە اتقان, ٷيدە ٶلتٸرگەن, ولاردى تانكٸلەرمەن تاپتاعان, ەيەلدەردٸ زورلاعان, بالالاردىڭ كٶزٸنشە ٶلتٸرگەن. ولار ەلدٸ ٷيٸندٸگە اينالدىرىپ جاتىر", - دەدٸ ۋكراينا پرەزيدەنتٸ.
بۇعان قوسا, زەلەنسكيي "اگرەسسور ازىق-تٷلٸك داعدارىسىنىڭ دا تۋىنداۋىنا ىقپال ەتكەنٸن, سونىڭ سالدارىنان افريكا مەن ازييادا اشتىق بولاتىنىن" ايتتى.
ۋكراينا پرەزيدەنتٸ بۋچاداعى قىرعىندى ەكٸنشٸ دٷنيەجٷزٸلٸك سوعىستان بەرگٸ "ەڭ جانتٷرشٸگەرلٸك ەسكەري قىلمىس" دەپ اتادى.
رەسەيدٸڭ حالىقارالىق ۇيىمداعى تۇراقتى ٶكٸلٸ ۆاسيليي نەبەنزيا بۇۇ قاۋٸپسٸزدٸك كەڭەسٸنٸڭ سەيسەنبٸدەگٸ وتىرىسىندا رەسەي ۋكرايناداعى "ازاماتتىق نىساندارعا سوققى جاسامايدى, بەيبٸت تۇرعىنداردى قورعايدى" دەپ مەلٸمدەدٸ.
رەسەي ەسكەرٸ تاستاپ كەتكەن بۋچا قالاسىندا ونداعان مەيٸت شاشىلىپ جاتتى, ولاردىڭ كەيبٸرٸنٸڭ قولى بايلانعانى انىقتالدى. بۇعان قوسا, قالادا ادامداردى بٸر ورىنعا جاپپاي كٶمگەنٸ مەلٸم بولدى. ۋكراين بيلٸگٸ بۋچادا 300-دەن استام بەيبٸت تۇرعىن رەسەيلٸك جاۋىنگەرلەر قولىنان مەرت بولدى دەپ مەلٸمدەدٸ.
رەسەي بيلٸگٸ بۋچادا بەيبٸت تۇرعىنداردى ٶلتٸردٸ دەگەن ايىپتاۋلاردى جوققا شىعارىپ وتىر.
