© Photo: primeminister.kz
Reseilik eksporttaýshylar úshin Qazaqstan temirjoly arqyly tasymaldaý tarifterin tómendetý máselesi 28 qarashada Orynborda talqylanady. Bul týraly vitse-premer – saýda jáne integratsiia ministri Serik Jumanǵarin málimdedi, dep habarlaidy Sputnik Qazaqstan.
Ministr Qazaqstan men Resei seriktes ekenin, bir-birinen eshteńe talap etpeitinin atap ótti.
"28 qarashada Orynborda eki Prezident júrgizetin óńiraralyq forým ótedi. Resei tarapy sol ýaqytta bizben kelissóz júrgizýge surandy. Men Overchýk myrzamen (Resei úkimeti tóraǵasynyń orynbasary) kezdesemin jáne bizdiń taraptan úlken delegatsiia qatysady. Resei arqyly tranzitpen ótýge múddeli iri biznesmenderdi de ózimmen birge ertip baramyn. Resei tarapy da óz kásipkerlerin alyp keletin shyǵar. Sol jerde osy máseleni talqylaimyz", - dedi Jumanǵarin Úkimet kýlýarynda.
Aitýynsha, bul máselede múdde balansyn tabý qajet.
"Eger bul bizge tiimsiz bolsa, árine, biz buǵan kelispeimiz. Bizdiń temirjol basshylyǵy da óz oiyn aitýy kerek. Óitkeni temirjol – sharýashylyq júrgizýshi sýbekt, ol tranzitten aqsha taýyp otyr. Onyń esebinen ishki tasymal, sonyń ishinde jolaýshylar tasymaly qamtamasyz etiledi", - dedi saýda ministri.
Ministrdiń aitýynsha, Qazaqstan tarapy da Resei arqyly tranzittiń qunyn tómendetýdi surap otyr.
"Mysaly biz de Resei arqyly jeńildik suraimyz. Ózderińiz bilesizder, Eýropaǵa kómir tasý kerek, basqa da ken bar. Biz qazir Reseiden porttarǵa elý paiyz jeńildik surap jatyrmyz. Olar da bizden jeńildik suraidy. Bul endi saýda ǵoi", - dedi ol.
Jumanǵarin tarif uzaq jyldar boiy ózgermegenin atap ótti. Al Reseidiń dándi daqyldar tranziti kerisinshe ulǵaiǵan.
Buǵan deiin Resei Qazaqstan arqyly astyq tasymaldaý tarifin tómendetýdi suraǵan bolatyn.
