QR Premer-Ministriniń orynbasary Eraly Toǵjanov otandyq QazVac vaktsinasyn kórshi elderge jetkizý týraly suraqtarǵa jaýap berdi, dep habarlaidy "Ult aqparat".
«Qazirgi ýaqytta ai saiyn QazVac vaktsinasynyń 100 myń dozasy shyǵarylady. Shilde aiyna da 100 myń vaktsina josparlanǵan. Al 30 tamyz ben 1 qyrkúiekte vaktsinanyń ailyq kólemi 600 myńǵa deiin ulǵaiady. Sondyqtan, qazirgi ýaqytta óndiris máseleleri tolyq baqylaýymyzda», - dedi Toǵjanov Ortalyq kommýnikatsiialar qyzmetinde tilshiler suraǵyna bergen jaýabynda.
Sonymen birge, spiker Qazaqstanda QazVac boiynsha defitsit joq ekenin, shamamen 30 myń vaktsina qalyp otyrǵanyn jetkizdi. Jekelegen óńirlerde vaktsina jetispeýshiligi baiqalsa, tolyqtyrylady.
«Kórshi elderge jetkizýge kelsek, iá, bizden vaktsina jetkizýdi suraityn elder bar. Biraq, eń aldymen, óz azamattarymyzdy qamtýymyz kerek. Ázirge maýsym men shilde, tipti tamyz ailarynda basqa elderge vaktsina jetkizý josparlanyp otyrǵan joq. Qyrǵyzstannan resmi suraý bar, ony keshe qarastyrdyq. Vaktsina shyǵarý kólemi 600 myńǵa jetken soń, qyrkúiekte shamamen million QazVac bolady, sol kezde osy máseleni kótere alamyz», - dep túsindirdi Eraly Toǵjanov.
