Búgin Parlament Májilisi qabyrǵasynda áleýmettik saladaǵy sybailas jemqorlyqqa qarsy is-qimyl máseleleri talqylanyp, onda depýtat Elnur Beisenbaev Týrizm jáne Sport vitse-ministrinen depýtattar ázirlegen lýdomaniiaǵa qarsy zań jobasy bir jarym jyl boiy Úkimettiń qaraýynda nege jatqanyn surady. Bul týraly "Ult aqparat" habarlaidy.
«Osydan týra 1,5 jyl buryn meniń áriptesterim «Býkmekerlik keńselerdi baqylaý týraly» zań jobasyn usynǵan. Týra 6 ai buryn prezident Qaýipsizdik keńesin ótkizdi. 2023 jyldyń qyrkúieginde joldaýdan keiin Qazaqstanda lýdomaniia problemasy bar ekenin aitty. Túrli resmi-beiresmi derekter boiynsha onyń ainalymy trillion teńgeden kóp. Biz barlyǵymyz sol zań jobasyn kútip otyrmyz. Biraq Úkimet áli ony belgisiz sebeptermen ustap otyr. Men bul jerde jemqorlyq táýekeli bar ma dep naqty Úkimetten kúdiktenemin», - dedi Elnur Beisenbaev.
Týrizm jáne Sport vitse-ministri Miras Tólebaev óz sózinde zańdy qaraý 45 jumys kúninen de kóp ýaqyt alatynyn aitty.
«Retteýshi áserdi taldaý birneshe etaptan turady. Olar qoǵamdyq talqylaý, ashyq úkimettiń qaraýy jáne jalpy kásipkerlikti qorǵaý men damytý boiynsha quzyrly bolyp esepteletin Ulttyq ekonomika ministrligi maquldaǵan bolýy tiis. Bul protsedýra resmi 45 jumys kúnin qamtidy. Ol minimým. Sonymen qatar birqatar kelispeýshilik bolsa, qaraý ýaqyty sozylýy múmkin. Lobbizm elementteri de bolýy múmkin ekenin joqqa shyǵarmaimyn. Onyń ishinde Kásipkerler palatasy da bar. Sebebi olardyń mindeti kásipkerlerdiń quqyǵyn qorǵaý. Jáne biz barlyq alańdarda, oǵan sizder de qatysqansyzdar, bul qarsylyqpen kúresip kelemiz. Retteýshi áserdi taldaýda 17 túzetý endi, bul zań jobasy 55 túzetý qarastyrady. Sondyqtan Úkimet ony qasaqana ustap otyr deý durys emes», - dedi vitse-ministr.
Vitse-ministrdiń sózine depýtat Ashat Aimaǵambetov te shúilikti.
«Úkimet zań jobasyn uzaq qaraýy arqyly Úkimet reglamentin jáne zańdy buzyp otyr», -dedi Ashat Aimaǵambetov.
