QR Densaýlyq saqtaý vitse-ministri - Bas memlekettik sanitarlyq dáriger Erlan Qiiasov COVID-19 koronavirýs infektsiiasynyń aldyn alý boiynsha júrgizilip jatqan sharalarmen tanysý maqsatynda Shyǵys Qazaqstan oblysyna bardy, dep habarlaidy "Ult aqparat".
Vedomstvoaralyq komissiia aqparatyna sáikes, vitse-ministr sapar barysynda Shyǵys Qazaqstan oblysynyń ákimi Danial Ahmetovpen kezdesip, aimaqtaǵy epidemiologiialyq jaǵdaidy, turǵyndar arasyndaǵy syrqat deńgeiin tómendetýge arnalǵan profilaktikalyq jáne epidemiiaǵa qarsy is-sharalardy talqylady. Vitse-ministr men óńir basshysy oblystyń COVID-19 koronavirýs infektsiiasynyń yqtimal ekinshi tolqynyna daiyndyǵyn qarastyrdy.
«Qazaqstandaǵy epidemiologiialyq jaǵdaidy baǵalaý matritsasyna sáikes, «sary aimaqta» jalǵyz – Shyǵys Qazaqstan oblysy tur. Qalǵany – «jasyl aimaqta». Osyǵan bailanysty óńirde koronavirýs infektsiiasynyń taralýyna jol bermeý boiynsha barlyq qajetti sharalardy qabyldaý qajet», - dedi E. Qiiasov.
Bas memlekettik sanitarlyq dáriger Shyǵys Qazaqstan oblysynyń Densaýlyq saqtaý basqarmasynyń, Politsiia departamentiniń jáne basqa da organdar men uiymdardyń ókilderimen kezdesip, ózara is-qimyl máselesin talqylady. Sonymen qatar, Shyǵys Qazaqstan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń ujymymen kezdesti, koronavirýs infektsiiasy boiynsha problemalyq máseleler men qazirgi epidemiologiialyq jaǵdaidy talqylady.
E. Qiiasov jumysty reformalaý, qyzmetkerlerdi yntalandyrý deńgeiin arttyrý jáne ózge de qabyldanǵan sharalar týraly aqparatpen tanystyrdy.
Sapar sońynda vitse-ministr QR Densaýlyq saqtaý ministrligi Taýarlar men kórsetiletin qyzmetterdiń sapasy men qaýipsizdigin baqylaý komitetiniń «Ulttyq saraptama ortalyǵy» ShJQ RM Shyǵys Qazaqstan oblysy boiynsha filialynyń qyzmetkerlerimen kezdesý ótkizdi. Taraptar zerthanalyq zertteýlerdiń tiimdiligin kóterý, PTR-zertteýlerdiń sany men qýatyn arttyrý, vedomstvoaralyq ózara is-qimyl jáne basqa da zerthanalar men ózge de qyzmetterdiń jumysyn úilestirý máselelerin talqylady.
Erlan Qiiasov sondai-aq oblys turǵyndary arasynda PTR testileý júrgizetin asa qaýipti infektsiialar zerthanasynyń materialdyq-tehnikasy, kadrlyq áleýetimen tanysty.
