QR Densaýlyq saqtaý vitse-ministri Ásem Núsipova koronavirýspen kúreske jumyldyrylǵan meditsina qyzmetkerlerine ótemaqy men tólemder taqyrybyna qatysty saýaldarǵa jaýap berdi, dep habarlaidy QazAqparat.
«Sońǵy kúnderi meditsina qyzmetkerlerine ótemaqy men tólemder taqyrybyna qatysty kóptegen saýal túsip jatyr. Osyǵan orai Densaýlyq saqtaý ministrligi koronavirýs pandemiiasymen kúrestegi meditsina qyzmetkerlerin qorǵaý jáne yntalandyrý salasynda ne istep jatqany jaily keńirek aqparat berýge tyrysamyn.
Memleket basshylyǵynyń tapsyrmasymen Úkimet COVID-19-ke jumyldyrylǵan barlyq meditsina qyzmetkerlerin materialdyq yntalandyrý jáne eńbek jaǵdailary qaýipsizdigin barynsha qamtamasyz etý boiynsha aýqymdy jumys júrgizdi.
Birinshi kezekte, atap óteiin, ministrlik indetti juqtyrý táýekeliniń 3 toby boiynsha meditsina qyzmetkerleriniń negizgi jalaqysynan bólek, ai saiynǵy tólemderdi jasaýdy jalǵastyrýda», - dep jazdy ol Facebook-paraqshasynda.
Onyń atap ótýinshe, «táýekeli óte joǵary» topqa kiretin reanimatsiia bólimshelerin qosa alǵan infektsiialyq statsionarlarda jumys isteitin dárigerlerdiń, ortasha jáne kishi meditsina qyzmetkerleriniń negizgi jalaqysyna qosymsha 850 myń tólem jasalady.
«Joǵary táýekel» - provizorlyq statsionarlar men jedel kómek dárigerleri, orta jáne kishi meditsina qyzmetkerleri. Olar negizgi jalaqylaryna 425 myń teńge alady.
«Ortasha táýekel» - karantindik statsionarlardyń dárigerleri, orta jáne kishi meditsina qyzmetkerleri, jedel járdem sanitarlyq dárigeri, júrgiýshiler jáne taǵy basqalary. Olar negizgi jalaqylaryna 212,5 myń teńge ústemeaqy alyp otyr«, - dedi Ásem Núsipova.
Sonymen qatar vitse-ministr 2023 jylǵa deiin meditsina qyzmetkerleriniń jalaqysy qalai kóteriletindigin tarqata aityp berdi.
«Osy jyldyń 27 mamyrda ótken Ulttyq qoǵamdyq senim keńesiniń III otyrysynda Memleket basshysy 2023 jylǵa qarai dárigerlerdiń jalaqysyn ekonomikadaǵy ortasha eńbekaqynyń 2,5 esesine deiin birtindep jetkizý qajettigin atap ótken bolatyn. Osyǵan orai 2021-2023 jyldarǵa arnalǵan respýblikalyq biýdjet týraly zańnyń jobasynda Densaýlyq saqtaý ministrliginen dárigerler men orta meditsina qyzmetkerleriniń jalaqysyn arttyrýǵa 2021 jyly 156,8 mlrd teńge, 2022 jyly 255,1 mlrd teńge, 2023 jyly 393,1 mlrd teńge kózdelgen. Sonymen qatar MÁMS qarajaty esebinen dárigerler men orta meditsina qyzmetkerleriniń jalaqysyn arttyrýǵa 2021 jyly 65,6 mlrd teńge, 2022 jyly 106,6 mlrd teńge, 2023 jyly 164,4 mlrd teńge baǵyttalady», - dedi ol.
Vitse-ministrdiń dereginshe, 247 meditsina qyzmetkeriniń jalaqysyna arnalǵan shyǵystardyń jalpy somasy 2021 jyly 222,3 mlrd teńgeni, 2022 jyly 361,7 mlrd teńgeni, 2023 jyly 557,5 mlrd teńgeni quraityn bolady.
«Osylaisha, dárigerlerdiń ortasha jalaqysy 2023 jyly ekonomikadaǵy ortasha jalaqynyń 2,5 esesin quraityn bolad. Bul rette barlyq yntalandyrýshy tólemderdi qosa alǵanda dárigerdiń ortasha jalaqysy 2021 jyly 320 myń, 2022 jyly 416 myń, 2023 jyly 561 myń teńgeni, orta meditsina qyzmetkeriniń jalaqysy 2021 jyly 166 myń, 2022 jyly 183 myń, 2023 jyly 201 myń teńgeni quraityn bolady», - dedi vitse-ministr.
Máselen, onyń aitýynsha, 1 stavkada dárigerdiń ortasha bazalyq jalaqysy yntalandyrýshy tólemderdi esepke alǵanda 2020 jylmen salystyrǵanda 2021 jyly statsionarda 188,5 myńnan 244 myńǵa, ambýlatorlyq-emhanalyq kómekte 180 myńnan 240 myń teńgege jetkiziledi. 1 stavkadaǵy orta meditsina qyzmetkeriniń ortasha jalaqysy 2021 jyly statsionarda 133 myńnan 155 myńǵa, ambýlatorlyq-emhanalyq kómekte 129 myńnan 154 myńǵa artady.
