Densaýlyq saqtaý birinshi vitse-ministri Marat Shoranov koronavirýsqa qarsy vaktsinatsiialaý máselesinde «chipteý» týraly daqpyrtqa senbeýge shaqyrdy, dep habarlaidy "Ult aqparat".
«Memleket basshysynyń QR júiesin engizý (immýndyq mártebe týraly aqparaty bar kod) jónindegi tapsyrmasyn oryndaý úshin jáne júielengen esepti júrgizý maqsatynda vaktsinatsiialaýdyń elektrondy pasporty ázirlenýde. Vaktsinatsiialaý týraly málimetter elektrondy formatta ministrliktiń ortalyqtandyrylǵan aqparattyq júiesine engiziledi. Bul shara óz kezeginde vaktsinatsiialanǵan azamattarǵa esep júrgizip, halyqtyń immýndyq mártebesin baqylaýǵa kómektesedi», - dedi Marat Shoranov OKQ-da ótken baspasóz máslihatynda.
Sondai-aq ol chipteýge qatysty qaýesetterge toqtaldy.
«Chipteý» týraly suraqtardyń qoiylatynyn aldyn ala bile otyryp, bul osyndai feikti jariialaityn vaktsinatsiiaǵa qarsylyq bildirýshilerdiń negizsiz málimdemesi ekenin atap ótkim keledi. Qurmetti jýrnalister, psevdosarapshylardyń sózine senbeýge shaqyramyn», - dedi ol.
