Tanymaldylyǵy Instagrammen ólshenetin juldyzdar kóbeiip ketti. Realdy tanymaldylyqqa jetý qolynan kelmeitin adamdardyń tirligi osyndai usaq-túiektiń ainalasynda órbitini beseneden belgili.
Aýditoriianyń aýanyn dóp basa biletin mundai juldyzdar óz degenine ońai jetedi. Taza tutynýshylar urpaǵy qalyptasyp úlgergen myna zamanda olar áli talai jerge shabatyny belgili bolyp otyr. Dei turǵanmen, eń basty tragediia sol juldyzdardyń virtýaldy tanymaldylyqqa maldanyp júrgeninde jatyr. Ondai juldyzdardy qazir bizdiń topastana bastaǵan «tv» jarnamalaýdan jalyqpaityn boldy. Sondyqtan da bul úrdiske úreilene qaramaý múmkin emes. Sebebi, qundylyqtardyń ornyn almastyrý dáýiri tikelei osy qubyjyq qubylystyń astarynda tyǵylyp tur. Jastar Ábdijámil Nurpeiisovtiń kim ekenin bilmeitin halge jetti. Esesine Dinara Sátjandy aýzynan tastamaityn urpaq ósip-jetildi.
Virtýaldy tanymaldylyqqa qol jetkizý asa qiyn sharýa emes. Tehnika kerek. Basqa ne kerek?! Eshteńe! Al, realdy tanymaldylyqqa jetý kez kelgenniń qolynan kelmeidi. Eń quryǵanda Dýlat Isabekovtiń talantynsyz tanymal bolýyń múmkin emes. Dál osy jerde Úlken óner men Buqaralyq óner kóz aldyma qatar keledi. Aiyrmashylyǵy Jer men Kóktei osy eki ónerdiń búgingi tańda sońǵysynyń asyǵy alshysynan turyp turǵany kóńilge kirbiń túsirmei qoimaidy. Buqaralyq ónerdiń baǵy janyp turǵany da bizdiń qoǵamnyń marǵaýlyǵynan ekenin moiyndamai taǵy tura almaisyń. Úlken ónerdiń tasada qalǵanyna qarnyń ashady. Nege? Negesi sol, Buqaralyq ónerdiń peshenesine Máńgilik bolý táleii eshqashan buiyrmaǵan. Ondai óner belgili bir ýaqyttyń enshisinde jutylyp qalatyn qasań óner ekenin ómir talai dáleldep bergen.
Halyqtyń ulylyǵy buqaralyq ónermen emes, Úlken ónermen ólshenedi. Esi bar Halyq qashanda Úlken ónerin joqtaýy tiis. Bolashaǵyn oilaityn Halyq Úlken óneriniń ainalasyn túgendeýdi ádetke ainaldyrýy shart. Sonda ǵana Ulttyǵymyzdy ulylai alamyz. Buqaralyq óner eshqashan dúnieni ózgerte alǵan joq. Ol – adamdardyń bir sáttik álsizdiginen ári asyp kórmegen kúibeń tirshilik. Uly óner ǵana Adamzatty jasampazdyqqa jetelei alady.
Sharhan Qazyǵuldyń feisbýktaǵy jazbasynan
