Qazaqstan elshiligi Martinas Majvidas atyndaǵy Litva ulttyq kitaphanasynda litva tiline aýdarylǵan «Qazaqstan tarihy» kitabynyń tusaýkeserin ótkizdi. Bul týraly QR Syrtqy ister ministrliginen málim etti, dep habarlaidy QazAqparat.
Qazaqstan Táýelsizdiginiń 30 jyldyǵyna arnalǵan is-sharaǵa Seimniń depýtattary, Syrtqy ister ministrliginiń, iskerlik jáne akademiialyq orta ókilderi, Qazaqstannyń qurmetti konsýldary, mádeniet qairatkerleri men qazaqstandyq stýdentter qatysty.
Kitaptan litvalyq oqyrman qazaq halqynyń ejelgi dáýirden búgingi kúnge deiingi tarihy, sondai-aq bostandyq pen táýelsizdik úshin kúresi týraly bile alady.
QR Elshisi Viktor Temirbaev bul is-shara Qazaqstan-Litva mádeni qatynastaryndaǵy mańyzdy oqiǵa ekenin atap ótti.
Diplomat qonaqtardy Qazaqstannyń Tuńǵysh Prezidenti – Elbasy Nursultan Nazarbaevtyń arqasynda qol jetkizilgen elimizdiń úsh onjyldyqtaǵy tabystarymen tanystyryp, qazirgi tańda bul baǵytty Memleket basshysy Qasym-Jomart Toqaev júrgizip kele jatqanyn atap ótti.
Kitap avtory, QR Bilim jáne ǵylym ministrligi Memleket tarihy institýtynyń direktory Erkin Ábil óziniń beineúndeýinde bul basylymnyń negizgi maqsaty - oqyrmandy Uly dala órkenietiniń tarihymen tanystyrý ekenin atap ótti. Onyń aitýynsha, sońǵy jyldary respýblika basshylyǵy Qazaqstan tarihynyń aspektilerin ǵylymi turǵydan zertteýge kóp kóńil bólip keledi.
Qazaqstan elshiligi «Jara» baspa úiine jáne onyń basshysyna kitapty Litva tiline aýdarýǵa jáne ony basyp shyǵarýǵa kómek kórsetkeni úshin alǵys bildirdi. Kitap Litvanyń jetekshi ýniversitetteriniń kitaphana qorlaryna jáne Vilniýs, Klaipeda jáne Kaýnas ortalyq qalalyq kitaphanalaryna jiberiledi.
Martinas Majvidas atyndaǵy Litva ulttyq kitaphanasy - Litvadaǵy eń iri ǵylymi kitaphana, Litva jáne sheteldik qujattardyń memlekettik qoimasy. Parlamenttik kitaphana, Eýropalyq odaqtyń, Dúniejúzilik banktiń, MAGATE-niń jáne basqa da birqatar halyqaralyq uiymdardyń depozittik kitaphanasy qyzmetin atqarady.
