Abaidyń mol murasyn ǵasyrdan-ǵasyrǵa jetkizetin biz – jastarmyz. Mundai pikirdi jýrnalist Viktoriia Tregýbova bildirdi, dep habarlaidy QazAqparat.
«Men Reseidiń Ýlianovsk oblysynda dúniege keldim. Anam – Jambyl oblysy Moiynqum aýdanynyń týmasy. Mektep bitirgen soń, ilim-bilim izdep, Reseige attandy. Sol jaqta ákemdi jolyqtyryp, ekeýi shańyraq kóteredi. Arada bes-alty jyl ótkende sheshem ákemdi tórkinine tanystyrmaq bolyp, Qazaqstanǵa keledi. Ákeme qazaq eliniń qonaqjailyǵy unaǵany sonshalyq, biz Reseige qaityp oralmadyq. Men kishkentai Ulanbel aýylynda ósip, sol jerde qazaq tilinde bilim aldym. Al, aǵam memlekettik tildi menen jaqsy biledi. Bizge úidegilerden tys syrlasý qajet bolsa, biz qazaq tilinde sóilesýge kóshemiz. Osyndai sátte olar bizge «naǵyz qazaqtar» dep ázildeidi. Meniń boiymda orys qany týlap jatsa da, meniń janym – qazaq. Sondyqtan men árqashan jáne barlyq jerde ózimdi «orystyń qazaq qyzy» dep tanystyramyn», - dedi ol Elbasy Nursultan Nazarbaevtyń tóraǵalyǵymen ótken Qazaqstan halqy Assambleiasy keńesiniń otyrysynda.
Sonymen qatar, ol QR Tuńǵysh Prezidentiniń bastamasymen qolǵa alynǵan «Rýhani jańǵyrý» baǵdarlamasy aiasynda ulttyq qundylyqtarymyz túgendelip, qaita jańǵyrǵanyn basa aitty.
«Siz árqashan etnostardyń Qazaqstan ekonomikasy men áleýmettik salasynyń jáne mádenietiniń damýyna qosqan zor úlesin atap júresiz. Biyl «Qazaqstandaǵy etnostardyń Qazaqstan halqynyń ortaq tarihi-mádeni murasyna qosqan úlesi» jobasy iske asyryldy. Onda V.Radlov, G.Belger, E.Brýsilovskii jáne basqalardyń esimderi jazylǵan. Olar barlyq qazaqstandyqtarǵa rýhani jaqyn jáne bizdiń birligimizdiń altyn arqaýy», - dedi Viktoriia Tregýbova.
Sonymen qatar, ol Qazaqstan Prezidenti Qasym-Jomart Toqaev bastamashylyq jasaǵan Abai Qunanbaiulynyń 175 jyldyǵyna arnalǵan poetikalyq chellendjge 1000-nan astam túrli etnos jastary belsene qatysqanyn aitty.
«Assambleianyń «Jańǵyrý joly» jastar qozǵalysyndaǵy dostarym áleýmettik jelilerdi Abaidyń óleńderimen, sózderimen, ánderimen toltyrdy. Abaidyń arqasynda qazaq tili bizdi – túrli etnos jastaryn biriktirdi. Abai shyǵarmashylyǵyna degen mahabbatymdy osy bir óleń joldarymen pash etkim keledi.
Óleń – sózdiń patshasy, sóz sarasy,
Qiynnan qiystyrar er danasy.
Tilge jeńil, júrekke jyly tiip,
Tep-tegis jumyr kelsin ainalasy.
Óleńge árkimniń-aq bar talasy,
Sonda da solardyń bar tańdamasy.
Ishi altyn, syrty kúmis sóz jaqsysyn
Qazaqtyń kelistirer qai balasy?
Ǵulama Abaidyń mol murasyn ǵasyrdan-ǵasyrǵa jetkizetin biz – jastarmyz. Endeshe Abaidy birge oqiyq, birge zerttep-zerdeleiik, birge taniyq!», - dedi Viktoriia Tregýbova.
.jpeg)