Shymkentte bir top sottalǵan azamat túrmedegi zańsyzdyqtardyń betin ashty. Tipti óz sózderi dáleldi bolý úshin jabyq mekemeniń kamerasynda otyryp, videoúndeý jariialady, dep habarlaidy sputniknews.kz.
Kameraǵa uialy telefon kirgizýdyń quny — 100 myń teńge
Shymkenttegi ICh 167/11 túzeý mekemesindegi jaǵdaiǵa kóńili tolmaǵan sottalýshylar birneshe ret quzyrly organdarǵa shaǵym túsirgen.
Alaida ol shaǵym ishten shyqpai, esh nátije bolmaǵan soń úsh azamat túrmedegi bylyqtardy jurtqa jariia etpek bolyp, bárin beinetaspaǵa túsirgen. Aitýlarynsha, abaqty ishinde kóp suraqty aqshaǵa sheshýge bolady. Mekeme qyzmetkerleri tipti ózderi ishke uialy telefon kirgizip berýge usynys tastaǵan. Tek bailanys quralyn kameraǵa kirgizý úshin olar qomaqty qarjy alyp otyrǵan.
"Myna telefondy satyp aldym. Jalpy 100 myń teńge berdim. Aldynda taǵy bir osyndai "prostoi" telefon kirgizip bergen maǵan. Istemei qaldy da, sosyn ony sýǵa aǵyzyp jiberdik. Bári biledi bizdiń telefonmen sóilesetinimizdi. Mine, qýattyǵyshy. Artynda taǵy da SIM kartalarym bar", - deidi sottalýshylardyń biri.
Bailanys quralyn jetkizip berýshi jazasyn óteýshilerdiń qyzmeti úshin alatyn aqysynyń qymbat ekenin aitqanda: "Biz bastyq ekeýmiz bul aqshanyń barlyǵyn qaltamyzǵa tyǵady deisińder me? Bizdiń de beretin jerlerimiz bar" dep jaýap qatypty.
Karta biznesi órship tur
Videoda jazasyn óteýshiler óz sózderi dáleldi bolsyn dep qoldaryndaǵy bir-bir uialy telefondaryn kórsetedi. Ol az degendei, jabyq mekemesinde karta biznesi týraly sóz qozǵaidy. Sottalýshylar túzeý mekemesiniń qyzmetkerlerin qumar oiyn arqyly ońai tabys taýyp otyr dep aiyptady.
"Jazamdy ótep jatqan kezde Jalǵasbaev Ermek maǵan kelip, "kartaǵa oiyn uiymdastyryp, maǵan ishten aqsha shyǵaryp bershi" dedi. "Iá"dep alyp aldym da, sizderge zańsyz is-áreketterin dáleldep berip jatyrmyn. "Úshten birin maǵan, úshten birin "vor v zakone"-larǵa jiberip otyrasyń" dedi. "Iá-iá" dedim, "olarǵa myna novyi SIM kartamen zvonda" dep ákep berdi. Men eshkimge zvondamai, sizderge dáleldep otyrmyn", — deidi jazasyn óteýshi beinejazbada.
"Joǵarǵy sot pen Bas prokýratýradan arasha suraimyz"
"Biz shyndyqty aityp jatyrmyz. Sottalǵandar telefondy, kartany, geroindy, anashany qaidan alady deisizder? Mine, ózderi aqshaǵa alyp kelip beredi. Onda myna úsh telefondy qalai kirgizemiz? Shymkent qalasy Sáýle aýdanyndaǵy ICh167/11 túrmesinde mine jaǵdai osyndai" dep janaiqaiyn jetkizgender túrme kameralarynda turmystyq zattar tek qaǵaz júzinde dep otyr. Tamaq máselesinde de tiisti as-aýqat berilmeidi degen túrmedegiler beinetaspany QR Joǵary soty men Bas prokýratýra, UQK sekildi quzyrly organdar kórse, tekserý sharalaryn júrgizedi degen úmitin jetkizdi.
Zańsyzdyqtar rastaldy
Tórt qabyrǵanyń ishinde otyrǵandardyń janaiqaiyna qatysty mán-jaidy bilý úshin Shymkent qalasy boiynsha qylmystyq-atqarý júiesi departamentine resmi hat joldap, jaýabyn aldyq. Departament basshysy Atelbek Dosmaǵambetov bul keleńsiz jaǵdaidy joqqa shaǵarmady. Túzeý mekemesinde tintý sharalary júrgizilip, tyiym salynǵan zattar tárkilenip alynǵan. Al sottalýshylar zańsyz áreketterin tizip shyǵyp, áshkere etken mekeme qyzmetkerleri tártiptik sharamen ońai qutylyp ketken.
"Beinejazbada aitylǵan qyzmetkerlerge qatysty qyzmettik tekserý júrgizilip, nátijesinde osy faktige qatysy bar dep tanylǵan qyzmetkerler men sottalǵandarǵa qatysty tártiptik sharalar qoldanyldy", — dep jazylǵan departamenttiń Sputnik redaktsiiasyna bergen jaýabynda.
Sondai-aq, ishki ister departamentindegiler túrmedegi rejimdi qaskóilikpen buzýshy dep tanylǵan sottalǵandardyń bul is-áreketteri arqyly qylmystyq-atqarý júiesi mekemesi ákimshiliginiń bedeline nuqsan keltirmek bolǵanyn atap ótken. Olar bolǵan jaǵdaiǵa ókinish bildiretinin jazbasha túrde rastapty.
