شىمكەنتتە بٸر توپ سوتتالعان ازامات تٷرمەدەگٸ زاڭسىزدىقتاردىڭ بەتٸن اشتى. تٸپتٸ ٶز سٶزدەرٸ دەلەلدٸ بولۋ ٷشٸن جابىق مەكەمەنٸڭ كامەراسىندا وتىرىپ, ۆيدەوٷندەۋ جارييالادى, دەپ حابارلايدى sputniknews.kz.
كامەراعا ۇيالى تەلەفون كٸرگٸزۋدىڭ قۇنى — 100 مىڭ تەڭگە
شىمكەنتتەگٸ يچ 167/11 تٷزەۋ مەكەمەسٸندەگٸ جاعدايعا كٶڭٸلٸ تولماعان سوتتالۋشىلار بٸرنەشە رەت قۇزىرلى ورگاندارعا شاعىم تٷسٸرگەن.
الايدا ول شاعىم ٸشتەن شىقپاي, ەش نەتيجە بولماعان سوڭ ٷش ازامات تٷرمەدەگٸ بىلىقتاردى جۇرتقا جارييا ەتپەك بولىپ, بەرٸن بەينەتاسپاعا تٷسٸرگەن. ايتۋلارىنشا, اباقتى ٸشٸندە كٶپ سۇراقتى اقشاعا شەشۋگە بولادى. مەكەمە قىزمەتكەرلەرٸ تٸپتٸ ٶزدەرٸ ٸشكە ۇيالى تەلەفون كٸرگٸزٸپ بەرۋگە ۇسىنىس تاستاعان. تەك بايلانىس قۇرالىن كامەراعا كٸرگٸزۋ ٷشٸن ولار قوماقتى قارجى الىپ وتىرعان.
"مىنا تەلەفوندى ساتىپ الدىم. جالپى 100 مىڭ تەڭگە بەردٸم. الدىندا تاعى بٸر وسىنداي "پروستوي" تەلەفون كٸرگٸزٸپ بەرگەن ماعان. ٸستەمەي قالدى دا, سوسىن ونى سۋعا اعىزىپ جٸبەردٸك. بەرٸ بٸلەدٸ بٸزدٸڭ تەلەفونمەن سٶيلەسەتٸنٸمٸزدٸ. مٸنە, قۋاتتىعىشى. ارتىندا تاعى دا SIM كارتالارىم بار", - دەيدٸ سوتتالۋشىلاردىڭ بٸرٸ.
بايلانىس قۇرالىن جەتكٸزٸپ بەرۋشٸ جازاسىن ٶتەۋشٸلەردٸڭ قىزمەتٸ ٷشٸن الاتىن اقىسىنىڭ قىمبات ەكەنٸن ايتقاندا: "بٸز باستىق ەكەۋمٸز بۇل اقشانىڭ بارلىعىن قالتامىزعا تىعادى دەيسٸڭدەر مە? بٸزدٸڭ دە بەرەتٸن جەرلەرٸمٸز بار" دەپ جاۋاپ قاتىپتى.
كارتا بيزنەسٸ ٶرشٸپ تۇر
ۆيدەودا جازاسىن ٶتەۋشٸلەر ٶز سٶزدەرٸ دەلەلدٸ بولسىن دەپ قولدارىنداعى بٸر-بٸر ۇيالى تەلەفوندارىن كٶرسەتەدٸ. ول از دەگەندەي, جابىق مەكەمەسٸندە كارتا بيزنەسٸ تۋرالى سٶز قوزعايدى. سوتتالۋشىلار تٷزەۋ مەكەمەسٸنٸڭ قىزمەتكەرلەرٸن قۇمار ويىن ارقىلى وڭاي تابىس تاۋىپ وتىر دەپ ايىپتادى.
"جازامدى ٶتەپ جاتقان كەزدە جالعاسباەۆ ەرمەك ماعان كەلٸپ, "كارتاعا ويىن ۇيىمداستىرىپ, ماعان ٸشتەن اقشا شىعارىپ بەرشٸ" دەدٸ. "يە"دەپ الىپ الدىم دا, سٸزدەرگە زاڭسىز ٸس-ەرەكەتتەرٸن دەلەلدەپ بەرٸپ جاتىرمىن. "ٷشتەن بٸرٸن ماعان, ٷشتەن بٸرٸن "ۆور ۆ زاكونە"-لارعا جٸبەرٸپ وتىراسىڭ" دەدٸ. "يە-يە" دەدٸم, "ولارعا مىنا نوۆىي SIM كارتامەن زۆوندا" دەپ ەكەپ بەردٸ. مەن ەشكٸمگە زۆونداماي, سٸزدەرگە دەلەلدەپ وتىرمىن", — دەيدٸ جازاسىن ٶتەۋشٸ بەينەجازبادا.
"جوعارعى سوت پەن باس پروكۋراتۋرادان اراشا سۇرايمىز"
"بٸز شىندىقتى ايتىپ جاتىرمىز. سوتتالعاندار تەلەفوندى, كارتانى, گەرويندى, اناشانى قايدان الادى دەيسٸزدەر? مٸنە, ٶزدەرٸ اقشاعا الىپ كەلٸپ بەرەدٸ. وندا مىنا ٷش تەلەفوندى قالاي كٸرگٸزەمٸز? شىمكەنت قالاسى سەۋلە اۋدانىنداعى يچ167/11 تٷرمەسٸندە مٸنە جاعداي وسىنداي" دەپ جانايقايىن جەتكٸزگەندەر تٷرمە كامەرالارىندا تۇرمىستىق زاتتار تەك قاعاز جٷزٸندە دەپ وتىر. تاماق مەسەلەسٸندە دە تيٸستٸ اس-اۋقات بەرٸلمەيدٸ دەگەن تٷرمەدەگٸلەر بەينەتاسپانى قر جوعارى سوتى مەن باس پروكۋراتۋرا, ۇقك سەكٸلدٸ قۇزىرلى ورگاندار كٶرسە, تەكسەرۋ شارالارىن جٷرگٸزەدٸ دەگەن ٷمٸتٸن جەتكٸزدٸ.
زاڭسىزدىقتار راستالدى
تٶرت قابىرعانىڭ ٸشٸندە وتىرعانداردىڭ جانايقايىنا قاتىستى مەن-جايدى بٸلۋ ٷشٸن شىمكەنت قالاسى بويىنشا قىلمىستىق-اتقارۋ جٷيەسٸ دەپارتامەنتٸنە رەسمي حات جولداپ, جاۋابىن الدىق. دەپارتامەنت باسشىسى اتەلبەك دوسماعامبەتوۆ بۇل كەلەڭسٸز جاعدايدى جوققا شاعارمادى. تٷزەۋ مەكەمەسٸندە تٸنتۋ شارالارى جٷرگٸزٸلٸپ, تىيىم سالىنعان زاتتار تەركٸلەنٸپ الىنعان. ال سوتتالۋشىلار زاڭسىز ەرەكەتتەرٸن تٸزٸپ شىعىپ, ەشكەرە ەتكەن مەكەمە قىزمەتكەرلەرٸ تەرتٸپتٸك شارامەن وڭاي قۇتىلىپ كەتكەن.
"بەينەجازبادا ايتىلعان قىزمەتكەرلەرگە قاتىستى قىزمەتتٸك تەكسەرۋ جٷرگٸزٸلٸپ, نەتيجەسٸندە وسى فاكتٸگە قاتىسى بار دەپ تانىلعان قىزمەتكەرلەر مەن سوتتالعاندارعا قاتىستى تەرتٸپتٸك شارالار قولدانىلدى", — دەپ جازىلعان دەپارتامەنتتٸڭ Sputnik رەداكتسيياسىنا بەرگەن جاۋابىندا.
سونداي-اق, ٸشكٸ ٸستەر دەپارتامەنتٸندەگٸلەر تٷرمەدەگٸ رەجيمدٸ قاسكٶيلٸكپەن بۇزۋشى دەپ تانىلعان سوتتالعانداردىڭ بۇل ٸس-ەرەكەتتەرٸ ارقىلى قىلمىستىق-اتقارۋ جٷيەسٸ مەكەمەسٸ ەكٸمشٸلٸگٸنٸڭ بەدەلٸنە نۇقسان كەلتٸرمەك بولعانىن اتاپ ٶتكەن. ولار بولعان جاعدايعا ٶكٸنٸش بٸلدٸرەتٸنٸن جازباشا تٷردە راستاپتى.
