Pavlodardaǵy jekemenshik balabaqshada shyqqan daý taǵy jalǵasty. Salqyn bólmege sheshindirip, jalańash tastap ketken balanyń oqiǵasyna qatysty tyń derekter paida boldy. Mektepke deiingi mekemeni basqaratyn kompaniia basshysy kópshilikti alańdatqan video montajdalǵanyn aitty, - dep habarlaidy Tengrinews.kz.
"Jelide jariialanǵan video úzindi ǵana. Ótken jumada politsiia oqiǵa qalai bolǵanyn anyq kórýge bolatyn tolyq videony aldy. Tárbieshi oryndyqtaǵy balalar kiimin alyp, sheshinetin bólmege kiredi. Ol balany kiindirmek bolǵan, biraq sábi kiingisi kelmegen. Bul týraly tárbieshi balanyń anasyna WhatsApp arqyly habarlaǵan. Birneshe minýttan keiin kishkentai qyz tynyshtalyp, tárbieshi ony kiindirip qoiǵan. Biraq jarty saǵat buryn qyzyna keletinin jazǵan anasyn kútý úshin tárbieshi sonda kútken", - deidi basqarýshy kompaniianyń basshysy Ali Vakýlik.
Onyń aitýynsha, jurtshylyqtyń narazylyǵyn týdyrǵan video birneshe kadrdan qosylǵan.
"Bul ádeii qosylǵan video. Balany kiim aýystyratyn bólmege kirgizgen kezde basqa video qosylǵan, esik ózgeredi. Aldyńǵy kadrda esik jabylǵanyn kóremiz. Túpnusqada esik ashyq qalady. Olar esik bala kirgennen keiin jabylǵandai etip kórsetken. Ondai bolǵan joq. Qyzdy eshkim mazaq etken joq, oǵan qatygezdik kórsetpegen. Kiinetin bólme jyly, onda barlyq bala kiim aýystyrady", - dedi Vakýlik.
Balabaqsha basshylyǵy alǵashynda zańbuzýshylyqty nege moiyndady degen suraqqa kásipker balabaqsha meńgerýshisiniń mindetin atqarýshy Pavlodar bilim bóliminiń nusqaýyn oryndaǵanyn aitty. Ózi sol kezde shetelde issaparda bolyp, jaǵdaidy zerttei almaǵan.
"Jýrnalister kelgen kezde ol ne isterin bilmei qalǵan. Bilim bóliminde oǵan nusqaý berilgen: "Bárin moiyndańyz, shara qoldandyq, tárbieshini jumystan shyǵardyq". Olar shý shyǵarǵysy kelmegen shyǵar. Iaǵni, jazbany zerttemei-aq, nusqaý bergen. Biz jumystan shyǵarylǵan tárbieshi men kútýshiden keshirim surap, jumysqa qaita oralýdy usyndyq. Jaǵdaidy anyqtamai adamdardy jumystan shyǵarǵan balabaqsha meńgerýshisiniń mindetin atqarýshyǵa qatań sógis jariialandy", - dedi Vakýlik.
Al, Bilim basqarmasy mektepke deiingi mekeme basshylyǵyna eshqandai nusqaý berilmegenin málimdedi.
"Balabaqshaǵa bardyq, qandai shara qoldanylǵanyn suradyq. Biraq eshqandai nusqaý bermedik. Kameradan túsirilgen beinejazbany ózimiz de kórmedik, birden prokýratýraǵa jiberdik. Qazir quqyq qorǵaý organdary ainalysyp jatyr", - dedi Pavlodardyń bilim bólimi ókilderi.
Balabaqsha málimetinshe, jumystan shyǵarylǵan tárbieshi men kútýshi senimsiz videony taratý faktisi boiynsha politsiiaǵa aryz berip úlgergen.
Buǵan deiin Jelide Pavlodar balabaqshasynda tárbieshi balany jalańashtap, salqyn bólmege 40 minýtqa qamap qoiǵany kórsetilgen video taraǵan edi.
