Veterinarlyq baqylaý jáne qadaǵalaý organdarynyń birqatar basshysyna sógis jariialandy, dep habarlaidy "Ult aqparat" Aýyl sharýashylyǵy ministrliginiń baspasóz qyzmetine silteme jasap.
Ministrlikte Veterinarlyq baqylaý jáne qadaǵalaý komitetiniń 2019 jylǵy jáne 2020 jyldyń birinshi jartyjyldyǵyndaǵy jumys qorytyndysy boiynsha alqa otyrysy ótti.
Veterinarlyq baqylaý jáne qadaǵalaý komitetiniń tóraǵasy Arman Óteǵulov eldegi veterinarlyq qaýipsizdik jáne epizootiialyq jaǵdai týraly baiandady. Onyń aitýynsha, byltyr 146 asa qaýipti aýrý tirkelse, osy jyldyń 6 aiynda 129 aýrý anyqtalǵan.
«Byltyr 17 asa qaýipti aýrýdyń aldyn alý maqsatynda janýarlar men qustarǵa 140 mln ekpe jasalǵan. Biylǵy jyly 150 mln salynady dep josparlanǵan. Ótken jyly 32,5 millionǵa jýyq janýar tekserildi, Nátijesinde 54,6 myń bastan brýtsellez anyqtaldy. 2020 jyldyń 6 aiynda 18,7 mln bastan 33 myń aýrý belgisi tabylǵan», delingen habarlamada.
Baiandama barysynda bas memlekettik veterinarlyq inspektor ótken jyly memlekettik shekara boiymen 32 veterinarlyq baqylaý pýnkti ornalastyrylǵannan keiin taýarlardyń eksporttyq-importtyq qozǵalysy kezinde zań buzýshylyq azaiǵanyn atap ótti.
A.Óteǵulovtyń aitýynsha, Qazaqstan naryǵyna kiretin sapasyz ónimder importy aitarlyqtai tómendegen.
Vedomstvo qyzmetkerleriniń basqa da jetistikteri bar. Atap aitqanda, 2019 jyly Dúniejúzilik janýarlardyń densaýlyǵyn saqtaý uiymy Qazaqstanǵa shoshqanyń afrikalyq obasy men joǵary patogendi qus tumaýynan azat el ataǵyn berdi. 2020 jyly klassikalyq shoshqa obasynan bosatylǵan el mártebesin aldyq. Osy ýaqyt aralyǵynda 3 myńǵa jýyq qazaqstandyq aýylsharýashylyq taýar óndirýshileri ónimderin eksporttaýǵa arnalǵan sheteldik tizimge engizildi. Máselen, 9 qazaqstandyq kompaniia QHR-ǵa siyr eti men qoi etin eksporttaýǵa quqyly kásiporyndar qataryna kirdi.
Sondai-aq, veterinarlyq baqylaý jáne qadaǵalaý komiteti qazaqstandyq shoshqa etin, sút ónimderi men jún shikizatyn Qytaiǵa eksporttaý týraly hattamalarǵa qol qoidy. Jylqynyń etin Japoniiaǵa eksporttaýǵa veterinarlyq sertifikat kelisildi, Eýropalyq Odaqpen bal jáne sút ónimderin eksporttaýǵa qoiylatyn talaptardy kelisý boiynsha kelissózder aiaqtalýda.
Alqa otyrysynda komitet pen aýmaqtyq bólimsheler jumysyndaǵy birqatar zań buzýshylyqtar qarastyrylyp, sebepteri taldandy jáne olardy sheshý joldary talqylandy.
«Statistikalyq esepterde jáne «Aýylsharýashylyq janýarlaryn birdeilendirý» málimetterinde kórsetilgen mal sany týraly aqparattardy salystyrý barysynda kemshilikter anyqtaldy. Birinshi jartyjyldyqtyń qorytyndysy boiynsha aiyrmashylyq 11,7% qurady. Budan ózge, aýylsharýashylyq janýarlarynyń monitoringisi diagnostikalyq zertteýlerindegi 3 millionǵa jýyq tekseriste qatelik bar. Sondai-aq, komitet biotermaldy shuńqyrlardyń tizilimin júrgizbeitini anyqtaldy: aqparattyq júiege mal qorymdary men sibir jarasynan ólgen janýarlardy kómýdiń tek 70% -y ǵana engizilgen», delingen habarlamada.
Jyl basynan bergi kameralyq taldaý nátijeleri boiynsha myńnan astam memlekettik qyzmet kórsetý merzimin keshiktirý faktisi tirkelgen.
«Veterinariialyq-sanitarlyq baqylaýdyń durys júrgizilmegeni úshin Soltústik Qazaqstan oblystyq aýmaqtyq inspektsiiasynyń basshysy Marat Ibraevqa qatań sógis berildi, Aqtóbe, Jambyl jáne Pavlodar oblystyq aýmaqtyq inspektsiialarynyń basshylary Temirbek Nurtazin, Jandar Qoekeev, Rashid Nurbekov jáne Atyraý men Túrkistan oblystyq aýmaqtyq inspektsiialary basshysynyń mindetin atqarýshy Ǵalymbek Bisenǵaliev pen Nurjan Úsenbaevqa sógis jariialandy. Qaraǵandy oblystyq aýmaqtyq inspektsiiasynyń basshysy Marat Muhtarovqa eskertý túrindegi ákimshilik jaza berildi. Mańǵystaý oblystyq Veterinarlyq baqylaý jáne qadaǵalaý komitetiniń aýmaqtyq inspektsiiasynyń bastyǵy Qýanyshkerei Myrzatovty qyzmetinen bosatý týraly sheshim qabyldandy», delingen habarlamada.
Komitettiń habarlaýynsha, Qostanai, Shyǵys Qazaqstan, Batys Qazaqstan, Almaty oblystyq inspektsiialarynyń basshylaryna, sondai-aq Shymkenttegi inspektsiia basshylaryna qatysty qyzmettik tergeý júrgizilip jatyr.
