ۆەتەرينارلىق باقىلاۋ جەنە قاداعالاۋ ورگاندارىنىڭ بٸرقاتار باسشىسىنا سٶگٸس جارييالاندى, دەپ حابارلايدى "ۇلت اقپارات" اۋىل شارۋاشىلىعى مينيسترلٸگٸنٸڭ باسپاسٶز قىزمەتٸنە سٸلتەمە جاساپ.
مينيسترلٸكتە ۆەتەرينارلىق باقىلاۋ جەنە قاداعالاۋ كوميتەتٸنٸڭ 2019 جىلعى جەنە 2020 جىلدىڭ بٸرٸنشٸ جارتىجىلدىعىنداعى جۇمىس قورىتىندىسى بويىنشا القا وتىرىسى ٶتتٸ.
ۆەتەرينارلىق باقىلاۋ جەنە قاداعالاۋ كوميتەتٸنٸڭ تٶراعاسى ارمان ٶتەعۇلوۆ ەلدەگٸ ۆەتەرينارلىق قاۋٸپسٸزدٸك جەنە ەپيزووتييالىق جاعداي تۋرالى باياندادى. ونىڭ ايتۋىنشا, بىلتىر 146 اسا قاۋٸپتٸ اۋرۋ تٸركەلسە, وسى جىلدىڭ 6 ايىندا 129 اۋرۋ انىقتالعان.
«بىلتىر 17 اسا قاۋٸپتٸ اۋرۋدىڭ الدىن الۋ ماقساتىندا جانۋارلار مەن قۇستارعا 140 ملن ەكپە جاسالعان. بيىلعى جىلى 150 ملن سالىنادى دەپ جوسپارلانعان. ٶتكەن جىلى 32,5 ميلليونعا جۋىق جانۋار تەكسەرٸلدٸ, نەتيجەسٸندە 54,6 مىڭ باستان برۋتسەللەز انىقتالدى. 2020 جىلدىڭ 6 ايىندا 18,7 ملن باستان 33 مىڭ اۋرۋ بەلگٸسٸ تابىلعان», دەلٸنگەن حابارلامادا.
بايانداما بارىسىندا باس مەملەكەتتٸك ۆەتەرينارلىق ينسپەكتور ٶتكەن جىلى مەملەكەتتٸك شەكارا بويىمەن 32 ۆەتەرينارلىق باقىلاۋ پۋنكتٸ ورنالاستىرىلعاننان كەيٸن تاۋارلاردىڭ ەكسپورتتىق-يمپورتتىق قوزعالىسى كەزٸندە زاڭ بۇزۋشىلىق ازايعانىن اتاپ ٶتتٸ.
ا.ٶتەعۇلوۆتىڭ ايتۋىنشا, قازاقستان نارىعىنا كٸرەتٸن ساپاسىز ٶنٸمدەر يمپورتى ايتارلىقتاي تٶمەندەگەن.
ۆەدومستۆو قىزمەتكەرلەرٸنٸڭ باسقا دا جەتٸستٸكتەرٸ بار. اتاپ ايتقاندا, 2019 جىلى دٷنيەجٷزٸلٸك جانۋارلاردىڭ دەنساۋلىعىن ساقتاۋ ۇيىمى قازاقستانعا شوشقانىڭ افريكالىق وباسى مەن جوعارى پاتوگەندٸ قۇس تۇماۋىنان ازات ەل اتاعىن بەردٸ. 2020 جىلى كلاسسيكالىق شوشقا وباسىنان بوساتىلعان ەل مەرتەبەسٸن الدىق. وسى ۋاقىت ارالىعىندا 3 مىڭعا جۋىق قازاقستاندىق اۋىلشارۋاشىلىق تاۋار ٶندٸرۋشٸلەرٸ ٶنٸمدەرٸن ەكسپورتتاۋعا ارنالعان شەتەلدٸك تٸزٸمگە ەنگٸزٸلدٸ. مەسەلەن, 9 قازاقستاندىق كومپانييا قحر-عا سيىر ەتٸ مەن قوي ەتٸن ەكسپورتتاۋعا قۇقىلى كەسٸپورىندار قاتارىنا كٸردٸ.
سونداي-اق, ۆەتەرينارلىق باقىلاۋ جەنە قاداعالاۋ كوميتەتٸ قازاقستاندىق شوشقا ەتٸن, سٷت ٶنٸمدەرٸ مەن جٷن شيكٸزاتىن قىتايعا ەكسپورتتاۋ تۋرالى حاتتامالارعا قول قويدى. جىلقىنىڭ ەتٸن جاپونيياعا ەكسپورتتاۋعا ۆەتەرينارلىق سەرتيفيكات كەلٸسٸلدٸ, ەۋروپالىق وداقپەن بال جەنە سٷت ٶنٸمدەرٸن ەكسپورتتاۋعا قويىلاتىن تالاپتاردى كەلٸسۋ بويىنشا كەلٸسسٶزدەر اياقتالۋدا.
القا وتىرىسىندا كوميتەت پەن اۋماقتىق بٶلٸمشەلەر جۇمىسىنداعى بٸرقاتار زاڭ بۇزۋشىلىقتار قاراستىرىلىپ, سەبەپتەرٸ تالداندى جەنە ولاردى شەشۋ جولدارى تالقىلاندى.
«ستاتيستيكالىق ەسەپتەردە جەنە «اۋىلشارۋاشىلىق جانۋارلارىن بٸردەيلەندٸرۋ» مەلٸمەتتەرٸندە كٶرسەتٸلگەن مال سانى تۋرالى اقپاراتتاردى سالىستىرۋ بارىسىندا كەمشٸلٸكتەر انىقتالدى. بٸرٸنشٸ جارتىجىلدىقتىڭ قورىتىندىسى بويىنشا ايىرماشىلىق 11,7% قۇرادى. بۇدان ٶزگە, اۋىلشارۋاشىلىق جانۋارلارىنىڭ مونيتورينگٸسٸ دياگنوستيكالىق زەرتتەۋلەرٸندەگٸ 3 ميلليونعا جۋىق تەكسەرٸستە قاتەلٸك بار. سونداي-اق, كوميتەت بيوتەرمالدى شۇڭقىرلاردىڭ تٸزٸلٸمٸن جٷرگٸزبەيتٸنٸ انىقتالدى: اقپاراتتىق جٷيەگە مال قورىمدارى مەن سٸبٸر جاراسىنان ٶلگەن جانۋارلاردى كٶمۋدٸڭ تەك 70% -ى عانا ەنگٸزٸلگەن», دەلٸنگەن حابارلامادا.
جىل باسىنان بەرگٸ كامەرالىق تالداۋ نەتيجەلەرٸ بويىنشا مىڭنان استام مەملەكەتتٸك قىزمەت كٶرسەتۋ مەرزٸمٸن كەشٸكتٸرۋ فاكتٸسٸ تٸركەلگەن.
«ۆەتەرينارييالىق-سانيتارلىق باقىلاۋدىڭ دۇرىس جٷرگٸزٸلمەگەنٸ ٷشٸن سولتٷستٸك قازاقستان وبلىستىق اۋماقتىق ينسپەكتسيياسىنىڭ باسشىسى مارات يبراەۆقا قاتاڭ سٶگٸس بەرٸلدٸ, اقتٶبە, جامبىل جەنە پاۆلودار وبلىستىق اۋماقتىق ينسپەكتسييالارىنىڭ باسشىلارى تەمٸربەك نۇرتازين, جاندار قوەكەەۆ, راشيد نۇربەكوۆ جەنە اتىراۋ مەن تٷركٸستان وبلىستىق اۋماقتىق ينسپەكتسييالارى باسشىسىنىڭ مٸندەتٸن اتقارۋشى عالىمبەك بيسەنعاليەۆ پەن نۇرجان ٷسەنباەۆقا سٶگٸس جارييالاندى. قاراعاندى وبلىستىق اۋماقتىق ينسپەكتسيياسىنىڭ باسشىسى مارات مۇحتاروۆقا ەسكەرتۋ تٷرٸندەگٸ ەكٸمشٸلٸك جازا بەرٸلدٸ. ماڭعىستاۋ وبلىستىق ۆەتەرينارلىق باقىلاۋ جەنە قاداعالاۋ كوميتەتٸنٸڭ اۋماقتىق ينسپەكتسيياسىنىڭ باستىعى قۋانىشكەرەي مىرزاتوۆتى قىزمەتٸنەن بوساتۋ تۋرالى شەشٸم قابىلداندى», دەلٸنگەن حابارلامادا.
كوميتەتتٸڭ حابارلاۋىنشا, قوستاناي, شىعىس قازاقستان, باتىس قازاقستان, الماتى وبلىستىق ينسپەكتسييالارىنىڭ باسشىلارىنا, سونداي-اق شىمكەنتتەگٸ ينسپەكتسييا باسشىلارىنا قاتىستى قىزمەتتٸك تەرگەۋ جٷرگٸزٸلٸپ جاتىر.
