Týystary usynǵan foto
Vengriiada 27 jastaǵy shymkenttik belgisiz jaǵdaida joǵalyp ketti. Sońǵy ret ony týystary Instagram jelisinde qazaqstandyq blogerdiń tikelei efirinen kórgen, - dep habarlaidy Tengrinews.kz agenttigi.
Qanatbek Ótebek biyl shildeniń aiaǵynda Chehiiaǵa jumys isteýge ketken. Onyń bir aiǵa jaramdy shengen vizasy bar, deidi týysy Balnur Ótebek. Onyń aitýynsha, Qanatbek Ótebekti Eýropaǵa tanystary shaqyryp, jumysqa ornalasýǵa kómektesemiz dep ýáde bergen.
"Bireýi taksist bolyp jumys isteitin, eki kóligi bar edi. Bireýin Qanatbekke bergen, ol da taksi júrgizýshi bolǵan. Ol Chehiiada eki aptaǵa jýyq jumys istep, keiin Beka esimdi blogerdi tapqysy keletinin aitty. Ol otandastarǵa jaqsy jalaqyǵa jumys tabýǵa kómektesip jatyr-mys. Onyń Instagram-paraqshasyna qaraǵanda, Beka júk kólikterin satyp alý jáne satýmen ainalysady, sonymen qatar júk tasymaldaýshylardy jumysqa ornalastyrady.
Eki apta sonda bolǵan soń Qanatbek sol kezde Vengriiada bolǵan blogerdi tapqysy keletinin aitty. Biraq Qanatbektiń taksi júrgizýshisi bolyp isteitin dosy odan Chehiiadan ketpeýdi ótingen, óitkeni Vengriianyń zańdary bólek, áldeqaida qatań bolýy da múmkin. Biraq ol tyńdamaǵan, birneshe kúnnen keiin ol jigittermen birge shyǵyp, blogerdi taýypty", - dep bólisti qyz.
Bul 10 tamyzdaǵy kadrlar. Balnur Ótebektiń aitýynsha, eki kúnnen keiin aǵasynan habar ala almai qalǵan. Taǵy eki-úsh kúnnen keiin týystary tikelei blogerge jazǵan. Alaida ol jaýap bermegen.
"Osydan soń, úsh-tórt kúnnen keiin Qazaqstannyń Vengriiadaǵy elshiligine habarlastyq. Aldymen call-ortalyqqa habarlastyq, ol jerge jazbasha ótinish berý kerek ekenin aitty. Jazdyq, bir-eki kúnde jaýap keldi. Sosyn bizge Beka degen bloger habarlasty. Nege onyń atyn jazǵanymyzdy, qazir ony elshilikke shaqyryp jatqanyn, eger ótinishti qaitaryp almasaq, Qanatbekke qiyn bolatynyn aitty. Beka aǵam bir-eki aptada bailanysqa shyǵatynyn aitty. Biz kónip, ótinishti qaitaryp aldyq, biraq eki apta ótse de Qanatbekpen habarlasa almadyq", - dedi ol.
Týystary ári qarai ne isteý keregin oilanyp júrgende, olarǵa Ázerbaijannan kútpegen qońyraý túsken. Olarmen kúieýi Vengriia túrmeleriniń birinde otyrǵan áiel habarlasqan. Áńgime barysynda onyń qasynda Qanatbek Ótebek otyrǵany belgili bolǵan.
"Aǵam ákemniń telefon nómirin ázerbaijandyqqa bergen, ol áielinen bizben bailanysyp, jaǵdaidy túsindirýdi ótingen. Biz bir-birimizdi áreń túsindik. Qanatbek afrikalyq bosqyndardy kólikpen tasymaldaý kezinde ustalypty. Bul zańsyz eken.
Bizge shara qoldaný kerek, elshilikke hat jazyp, advokat tabý kerek ekenin aitty. Áitpese olar aǵamdy túrmede ustai beredi. Ázerbaijandyq áiel kúieýiniń túrmede otyrǵanyna segiz ai bolǵanyn aitty. Sondyqtan oǵan týystaryn shaqyrýǵa ruqsat berilgen. Qazir ol elshilikke kómek surap aryz jazypty. Al ótinish bermegender túrmede otyrady", - dep basa aitty qyz.
Balnur Ótebek budan keiin blogerge týystary qaita telefon soqqanyn aitty. Onyń aitýynsha, ol taǵy da bul oqiǵaǵa ózin aralastyrmaýdy ótingen. Budan keiin Qanatbek Ótebektiń týystary Qazaqstannyń Vengriiadaǵy elshiligine taǵy da júgingen.
"Elshilik qyzmetkerine ázerbaijandyq áielden alǵan túrmeniń mekenjaiyn berdik. Biraz ýaqyttan keiin ol bizge telefon soǵyp, aǵama tez arada advokat kerek ekenin aitty. Men elshilik Qazaqstan azamattaryna kómektesý úshin, tym bolmasa tegin advokattardy tabý úshin osyndai ister úshin jumys isteidi dep oilaitynmyn. Óitkeni, elshilik qyzmetkerleri bul el týraly, onyń zańdary týraly kóbirek biledi jáne ol jaqqa jaqsy beiimdelgen. Onyń ústine, kez kelgen elde tegin advokattardy jaldaýǵa múmkindik bar.
Biraq elshiliktegiler habarlasyp, advokattardyń bailanys nómirlerin beremiz dep qana aitty. Mine, bir apta ótti, bizge habarlasqan joq. Elshilik qyzmetkerinen de hattarymyzǵa jaýap ala almai otyrmyz", - dep túiindedi ol.
Aita keteiik, Shymkentte Qanatbek Ótebekti áieli men eki balasy – tórt jasar qyzy men eki jasar uly kútip otyr.
Qazaqstannyń Syrtqy ister ministrligi Qanatbek Ótebektiń tóńiregindegi jaǵdaiǵa qatysty ázirge pikir bere almaityndaryn habarlady.
