Qazaqstandaǵy júzege asqan konstitýtsionaldyq ózgerister eldiń damýyna úlken septigin tigizdi. Bul pikirdi Eýropa Keńesi Venetsian komissiiasynyń prezidenti Djanni Býkikkio halyqaralyq konferentsiiada aitty, dep habarlaidy QazAqparat.
«1990 jylǵy 24 sáýirde Qazaq SSR Prezidenti laýazymyn belgileý týraly Zańy qabyldandy. Bul óz kezeginde ulttyq mekemelerdi qurýda mańyzdy qadam boldy», - dedi D. Býkikkio Qazaqstanda prezidenttik institýttyń engizilgenine 30 jyl tolýyna orai onlain rejimdegi halyqaralyq ǵylymi-tájiribelik konferentsiiada.
«Venetsian komissiiasynda biz tiisti taldaý júrgizdik. Biraz jyldan beri Venetsian komissiiasy kóptegen elderge qoldaý kórsetýde, onyń ishinde Qazaqstan da bar. Bul turǵyda konstitýtsionaldyq reformalar júrgizýde tiisti qoldaýlar jasaldy. Konstitýtsiia bastapqydan durys jazylyp, teńgerimdi bolǵanymen, kóp jaǵdaida sol Konstitýtsiianyń erejeleri qalai oryndalyp jatqany ózekti bolady», - dep toqtaldy atalǵan komissiiasynyń prezidenti.
Djanni Býkikkio tájiribelik qadamdarǵa toqtala kele, Konstitýtsiiaǵa túzetýler engizýde qajettilikter bolatynyn atap ótti.
«Nelikten demokratiialyq elder konstitýtsionaldyq reformalardy júrgizedi? Bul qadamdar atqarýshy, zańnamalyq ári sot sekildi bilik tarmaqtary arasynda teńgerimge qol jetkizý úshin, sondai-aq aldaǵy syn-qaterdi eńserýge ári azamattardyń zańdy talabyn qanaǵattandyrý úshin iske asyrylady... 2017 jylda Qazaqstanda konstitýtsionaldyq reformalardy júrgizý kezindegi negizgi maqsat – ol bilikti bólýdiń qoldanystaǵy júiesin jaqsartý. Venetsian komissiiasy osyndai konstitýtsionaldyq ózgeris alǵa ilgerileýdegi úlken qadam bolady dep sanaidy», - dedi Djanni Býkikkio.
