Venesýela biligi elge jan-jaqtan kelip jatqan gýmanitarlyq kómekterden bas tartyp jatyr. AQSh, Braziliia, Kolýmbiiadan kelgen júk kólikteri shekarada toqtatylǵan. Oppozitsiialyq lider Hýana Gýaidony qoldaityn AQSh biligi 20 mln dollar kóleminde qarajat bólgen.
Alaida, shekaradaǵy qaqtyǵystarǵa qaramastan, Venesýela barlyq kómekten bas tartyp jatqan joq. Madýro jaqynda ǵana Karakasqa jetkizilgen, 300 tonna kólemindegi kómek úshin Reseige alǵys aitty.
Memleket basshysy Madýro AQSh kómegi onyń biligin qulatýǵa baǵyttalǵanyn aitty. AQSh-tan tamaq, dári-dármek, gigienalyq zattar suraǵan Hýana Gýaido ózin aqpan aiynda Venesýelanyń ýaqytsha prezidenti dep jariialaǵan bolatyn.
Ótken aptada Nikolas Madýro Resei eli jóneltken 300 tonna tamaq, dári-dármek 20 aqpanda elge jetedi dep habarlaǵan.
Alaida DDSU-men tyǵyz bailanystaǵy Panamerikalyq densaýlyq saqtaý uiymy 21 aqpanda Venesýelaǵa Reseiden 7,5 tonna zat jetkizilgenin aitty. Dál mundai kómek 2018 jyldyń sáýirinde de jetkizilgen.
Dúniejúzilik densaýlyq saqtaý uiymy ótken jyly 50 tonna shet eldik gýmanitarlyq kómekti tekseristen ótkizgen edi. Venesýeladaǵy uiymdar elde dári-dármek pen meditsinalyq zattar tapshy deidi. Venesýela farmatsevtikalyq federatsiiasy dári-dármektiń 85%-y joq ekenin málimdedi.
Birikken ulttar uiymynyń málimetine súiensek, Venesýelaǵa 2018 jyly 24 mln dollar kóleminde gýmanitarlyq kómek kórsetilgen. Bunyń ishine BUU jinaǵan 9 mln dollar da kiredi. Osy jyly BUU arqyly Venesýela 15 mln dollar alǵan.
Sonymen qatar 2018 jyly Eýropalyq komissiia Venesýeladaǵy eń iri donorlardyń biri boldy. Ol 2016 jyldan beri kriziske tap bolǵan elge gýmanitarlyq kómek berýmen keledi.
Eýropalyq odaq jergilikti halyqqa beriletin tamaq, sý, gigienalyq jáne sanitarlyq zattarǵa qatysty proektpen ainalysady. Ótken jyly maýsym aiynda Eýropalyq odaq 35 mln eýro, jeltoqsan aiynda taǵy 20 mln eýro, al biyl qosymsha taǵy 5 mln eýro qarajat bólgen.
Saltanat Shynádil
