Aýstriia astanasy Venada lańkestik shabýyl boldy. Qarýly shabýyldy birneshe qaskói uiymdastyrǵan, olardyń birin politsiia atyp óltirdi, enndi sybailastaryn izdep jatyr. Qalada aýqymdy arnaiy operatsiia júrgizilýde, dep habarlaidy Euronews.
Politsiianyń málimetinshe, shabýyl alty orynda, sonyń ishinde - qala ortalyǵyndaǵy sinagoga janynda, evrei ortalyǵy men meiramhana janynda bolǵan.
Quqyq qorǵaý organdary eki adamnyń qaza tapqanyn, birneshe adamnyń aýyr jaraqat alǵanyn, onyń ishinde politsiia qyzmetkeri bar ekenin rastady. Qala biliginiń málimetinshe, teraktide 15 adam zardap shekken.
Al, jedel járdem qyzmeti birneshe adamnyń qaza tapqany týraly habarlady.
BBC saitynyń jazýynsha, shabýyl kezinde aýyr jaraqattanǵan bir áiel aýrýhanada kóz jumǵan.
Ishki ister ministri Karl Nehammer “baqaishaǵyna deiin qarýlanǵan qaýipti” topty tabý úshin izdestirýge arnaiy jasaq jumyldyrylǵanyn habarlady.
Bilik qala turǵyndarynan úiden shyqpaýdy, terezege jaqyndamaýdy suraidy jáne kýágerlerge oqiǵa ornynan video men sýretti áleýmettik jelige taratpaýǵa shaqyrdy. Qalada qoǵamdyq kólik toqtatyldy.
Ravvin Shlomo Hofmeister jýrnalisterge shabýyl kezinde sinagoga jabyq bolǵanyn aitty. Ol barǵa kelýshilerge oq atqan kem degende bir adamdy kórgen.
3 qarashadan bastap Aýstriia koronavirýsqa bailanysty karantin engizdi. Atap aitqanda keshke barlar men meiramhanalar adamǵa tolyp ketetindikten, 20:00-den 06:00-ge deiin úiden shyǵý shekteldi.
Aýstriia kantsleri Sebastian Kýrts politsiia shabýyl jasaýshylarǵa qarsy batyl áreket etetinin aitty. «Bul - jiirkenishti terroristik shabýyl. Biz terrorizmmen qorqytyp-úrkitýge jol bermeimiz jáne mundai shabýyldarǵa qarsy bar kúsh-jigerimizben kúresemiz», - delingen kantslerdiń málimdemesinde.
