Tanymal qazaqstandyq vainerler Meiirjan Tórebaev pen Meiirhan Sherniiazovty qamaýdaǵy merzimi taǵy bir aiǵa uzartyldy, - dep habarlaidy "Ult aqparat".
"Almaty qalasynyń mamandandyrylǵan aýdanaralyq tergeý soty 2022 jylǵy 18 qarashadaǵy sot sheshimimen kúdiktini qamaýda ustaý merzimin qylmystyq is materialdarymen tanysý kezeńinde bir aiǵa, iaǵni 18 jeltoqsanǵa deiin sanktsiialaý týraly tergeý organdarynyń ótinishi qanaǵattandyryldy. Sheshim zańdy kúshine engen joq", - delingen sottyń baspasóz habarlamasynda.
Sondai-aq, sot bir kúnnen keiin Sherniiazovqa qatysty qaýly shyǵarǵan. Ony qamaýda ustaý merzimi de bir aiǵa uzartyldy.
"Sot sheshimi boiynsha, kúdiktini qylmystyq is materialdarymen tanysý kezeńinde qamaýda ustaý merzimin bir aiǵa, iaǵni 19 jeltoqsanǵa deiin sanktsiialaý týraly tergeý organdarynyń ótinishi qanaǵattandyryldy", - dep tolyqtyrdy sot ókilderi.
Eske salaiyq, osy jyldyń aqpan aiynda vainerler Meiirjan Tórebaev pen Meiirhan Sherniiazov Mudarabah Capital qarjy piramidasyn qurdy degen kúdikke ilingen bolatyn. 20 sáýirde olar 10 táýlikke qamaýǵa alynǵan. Al onyń merzimi tergeý jumystaryna bailanysty ár ai saiyn uzartylyp keledi.
