AQSh prezidenti Donald Tramp Reseige qarsy qosymsha ekonomikalyq sanktsiia engizýdi keiinge qaldyrýǵa pármen berdi. Buǵan deiin AQSh-taǵy BUU-daǵy turaqty ókili Nikki Heili AQSh Qarjy ministrligi Máskeýdiń Siriiadaǵy ustanymyna bailanysty Reseige qarsy jańa sanktsiialar salýy múmkin ekenin málimdegen.
Sonymen qatar keshe Aq úidiń baspasóz hatshysy Sara Sanders te jýrnalisterge ákimshilik Siriiadaǵy himiialyq shabýyldan soń Reseige qatysty qosymsha sanktsiia salý jaiyn oilastyryp jatqanyn habarlaǵan.
AQSh prezidenti ákimshiligindegi resmi derekkózderi Reseige qarsy ekonomikalyq sanktsiialar basqa da sharalarmen birge qarastyrylyp jatqanyn rastady. Biraq, Tramptyń sózinshe, bul sharalarǵa qatysty túpkilikti sheshim ázirge qabyldanǵan joq. Reuters agenttiginiń habarlaýynsha, Vashington AQSh prezidenti Resei tarapynan salmaqty sebep bolmaiynsha qosymsha sanktsiia salýdy maquldaýy ekitalai dep biledi.
AQSh Qarjy ministrligi sáýirdiń basynda reseilik 38 biznesmen, sheneýnik pen kompaniiaǵa qarsy sanktsiia salǵan. Sanktsiiaǵa ilingender arasynda biznesmender Oleg Deripaska, Kirill Shamalov jáne Viktor Vekselberg, ishki ister ministri Vladimir Kolokoltsev, Federatsiia keńesi halyqaralyq ister komitetiniń tóraǵasy Konstantin Kosachev, Resei Qaýipsizdik keńesiniń hatshysy Viktor Zolotov bar.
Vashington ol kezde sanktsiia Reseidiń "álemdegi, onyń ishinde Ýkraina men Siriiadaǵy jaýlyq saiasatyna" bola salynǵanyn málimdegen.
