23 naýryzda Qaraǵandy áýejaiyna Varshava – Qaraǵandy reisiniń ushaǵy kelip qondy. Arnaiy reistiń bortynda 207 adam bolǵan. Olardyń barlyǵy COVID-19 virýsyna test tapsyrdy. Jolaýshylardyń eshqaisysynda aýrý anyqtalǵan joq, dep habarlaidy "Ult aqparat" Qaraǵandy oblysy ákiminiń baspasóz qyzmetine silteme jasap.
Bortta shetelde oqyp jatqan qazaqstandyq stýdentter jáne ózge de otandastarymyz boldy.
Elimizdiń Úkimeti turaqty áýe qatynasynyń toqtaýyna qaramastan, qazaqstandyqtarǵa otanyna oralýǵa kómektesý úshin arnaiy reister jibergen bolatyn.
Ushaq Qaraǵandy áýejaiynyń aýmaǵyna qonǵannan keiin bortqa dárigerler brigadasy kóterildi. Árbir jolaýshy qatań epidemiologiialyq reglament boiynsha muqiiat meditsinalyq baqylaý rásiminen ótti. Barlyq sharalar oryndalǵan soń kelýshiler qaladan tys arnaiy gospitalǵa jetkizildi.
- Barlyq dárigerler Polshadan kelgen adamdardy baqylaý úshin gospitalge óz erkimen keldi. Bul – bizdiń dárigerlik paryzymyz. Biz barlyǵynyń saý ekenin bilgende qatty qýandyq, - deidi jalpy tájiribe dárigeri Hairolla Erǵashev.
Varshava-Qaraǵandy reisiniń jolaýshylary karantinde eki kún boldy. Osy ýaqyt aralyǵynda aǵzada koronavirýs bar bolýyna taldaý jasaldy. Testiler barlyq kelgenderdiń deni saý ekenin kórsetti.
Qazir olardyń barlyǵy týǵan qalalaryna jolǵa shyǵa bastady. Reistiń jolaýshylary qaraǵandylyq dárigerler men politseilerge qiyn ýaqytta qoldaý kórsetkenderi úshin úlken alǵys bildiredi.
«Bul qadam – Otanymyz bizdi árqashan qiyn ýaqytta da kútip, qorǵaitynyn taǵy da túsinýge múmkindik berdi», dedi kelgenderdiń biri.
