Semei qalasynyń ziratynda ǵalym Qaiym Muhamedhanovtyń qulpytasyn belgisiz bireýler buzyp ketken, dep habarlaidy "Ult aqparat".
Qoǵam qairatkeri, Memlekettik syilyqtyń iegeri Qaiym Muhamedhanovtyń qulpytasy biyl birinshi ret buzylyp otyrǵan joq. Ǵalymnyń bel balasy Qanaǵat Qaiymulynyń aitýynsha, osydan 10 jyldam astam ýaqyt buryn belgisiz bireýler qulpytasty alǵash ret qiratyp ketken.
«Biyl ákemizdiń 105 jyldyǵynda da bul qiianat qaitalanyp otyr. Kúni keshe týǵan-týystarmen birge ziiarat jasaý úshin ákemizdiń basyna barǵan edik. Buzylyp, toz-tozy shyǵyp jatqan qulpytasty kórgende jaǵamyzdy ustadyq. Bul degen masqara ǵoi! Eli úshin eńbek etken, óle-ólgenshe halqynyń qamyn jegen ákemizdiń arýaǵyn qorlaý kimge kerek?! Vandaldardyń áreketin osylai bei-jai qaldyrýǵa bolmaidy. Olar basqa qulpytastarǵa esh zaqym keltirmei, tek ákemizdikin ǵana talqandap ketken», - dedi ol.
Máseleni Semei qalasynyń ákimdigi nazarǵa alǵan.
«Búgin shahar ákiminiń orynbasary Aidar Sadyrbaev bizben birge beiit basyna bardy. Buzylǵan jerlerin qarap, mamandarǵa teksertip, aldaǵy ýaqytta jóndeý jumystary júrgiziletinin jetkizdi. Aldaǵy ýaqytta mundai jaǵdai qaitalanbasa eken deimiz», - dedi Qanaǵat Qaiymuly.
