QR Ultyq bankiniń tóraǵasy Ǵalymjan Pirmatov bank júiesindegi depozitter kórsetkishin baiandady. Aqpan aiynda depozitter 38%-ǵa deiin dollarlanǵan, dep habarlaidy QazAqparat.
«Bank júiesindegi depozitter jyl basynan beri 27,7 trln teńgege deiin 2,3%-ǵa ulǵaidy, onyń ishinde zańdy tulǵalardyń salymdary – 14,1 trln teńgege deiin 2,1%-ǵa, jeke tulǵalardiki 13,6 trln teńgege deiin 2,5%-ǵa artty», - dedi Ǵalymjan Pirmatov Úkimet otyrysynda.
Onyń aitýynsha, valiýtalyq salymdar 10,6 trln teńgege deiin 8,9%-ǵa ósti, al ulttyq valiýtadaǵy depozitter 17,1 trln teńgege deiin 1,5%-ǵa tómendedi. Nátijesinde, depozitterdiń dollarlanýy aqpan aiynda 38,4% bolǵan.
«Resei bankterine jáne olardyń Qazaqstandaǵy enshiles uiymdaryna sanktsiialardyń kúsheiýi atalǵan bankterdiń jumysyna, atap aitqanda dollardaǵy, eýrodaǵy aýdarymdar men kartalyq operatsiialarǵa áser etti. Visa jáne Mastercard halyqaralyq tólem júieleri olardyń kartalary boiynsha operatsiialarǵa shekteý qoidy. Ulttyq bank bankterdiń óz klientterine qyzmet kórsetýi úshin jaǵdai jasaýda. Resei bankteriniń enshiles bankteri shekteýsiz túrde qolma-qol teńgemen qamtamasyz etilýde.
Atalǵan bankterge engizilgen sanktsiialar men shekteýler qazaqstandyq bankterdiń qyzmetine bailanysty emes jáne olarǵa yqpal etpeidi. Ulttyq bank jaǵdaidyń damýy men olardyń naryqtarǵa yqpalyn únemi qadaǵalap, sanktsiialardyń Qazaqstannyń qarjy júiesine áser etý dárejesin baǵalap otyrady, sondai-aq qarjy jáne baǵa turaqtylyǵyn qamtamasyz etý úshin shara qabyldaýdy jalǵastyrady», - dedi Ǵalymjan Pirmatov.
