Májilistiń jalpy otyrysynda «Qazaqstan Respýblikasynyń keibir zańnamalyq aktilerine shetel valiýtasyndaǵy ipotekalyq qaryzdar jáne kórsetiletin tólem qyzmetteri naryǵynyń sýbektilerin retteýdi jetildirý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasynyń negizgi maqsaty - valiýtalyq ipoteka alýshylardyń boryshtyq júktemesin tómendetý jáne bolashaqta valiýtalyq táýekeldi bolǵyzbaý, sondai-aq banktik emes qarjy uiymdary men tólem júieleriniń qyzmetin retteýdi jetildirý.
Májilis depýtaty Petr Sharapaevtyń aitýynsha, zań jobasy boiynsha komitetter men depýtattardan 80-nen astam usynys tústi. Onyń ishinde 2020 jyldyń sońyna deiin ekonomikalyq ósýdi qalpyna keltirý jónindegi keshendi jospar aiasynda kózdelgen. Atap aitqanda infraqurylymdy, ishki óndiristi, kásipkerlikti damytýdy qoldaýǵa jáne jumyspen qamtýdy qamtamasyz etýge qatysty sharalardy iske asyrýdy zańnamalyq turǵydan qamtamasyz etý maqsatyndaǵy túzetýler engizildi.
Zań jobasynyń jekelegen normalaryn jetildirý maqsatynda mynadai túzetýler eskerilgen:
1) Qarjylyq kórsetiletin qyzmetterdi tutynýshylardyń quqyqtaryn qorǵaý bóliginde:
- bankterge boryshtyq júktemeni tómendetý maqsatynda shetel valiýtasyn ulttyq valiýtaǵa aýystyrý kezinde shetel valiýtasyndaǵy ipotekalyq qaryz boiynsha qaryz alýshynyń aqshalai mindettemesin azaitý túrindegi jaqsartý shartyn valiýtalyq ipotekalyq qaryz alýshynyń ótinishinsiz qoldaný quqyǵy berildi;
2) Mikroqarjy qyzmetin litsenziialaý bóliginde:
- mikroqarjy qyzmetin júzege asyratyn uiymdardy eseptik tirkeýdiń ornyna 2021 jylǵy 1 qańtardan bastap mikroqarjy qyzmetin litsenziialaý engiziledi;
3) Azamattyq-quqyqtyq sipattaǵy sharttar boiynsha kiris alatyn jeke tulǵalar úshin júktemeni tómendetý maqsatynda mindetti zeinetaqy jarnalary alynǵan kiristiń 10 paiyzynan 5 paiyzyna deiin tómendetildi.
