Qazaqstanda qyzylshaǵa qarsy vaktsinatsiiadan bas tartý - osy aýrýǵa shaldyǵýǵa yqtimaldylyqty úsh eseleidi. Bul týraly OKQ-da ótken baspasóz máslihatynda QR Bas memlekettik sanitariialyq dárigeri Jandarbek Bekshin málim etti, dep habarlaidy QazAqparat tilshisi.
«Bizdiń mindetimiz - immýndy emes kontingentti anyqtaý. Amerikalyq ǵalymdar 2017 jyly zertteý jumystaryn júrgizgen bolatyn. Ol ǵalymdar eger vaktsinatsiiadan bas tartqandardyń sany 5 paiyzǵa ósetin bolsa, osy aýrýǵa shaldyǵý deigeii úsh esege kóbeietinin dáleldep shyqty. Eger ótken jyly elimizde vaktsinatsiiadan 6 myń adam bas tartsa, endeshe qyzylshaǵa shaldyǵýshylardyń sany 18 myńǵa jetedi dep boljai berýge bolady. Qyzylsha óziniń meńdep ketýimen qaýipti. Tek simptomatika boiynsha emdeledi», - deidi Jandarbek Bekshin.
Eske sala ketsek, Qazaqstanda 1 sáýirden bastap qyzylshaǵa qarsy vaktsinatsiia júrgiziledi.
«Qazirgi tańda Qazaqstanda qyzylsha boiynsha epidemiologiialyq jaǵdai kóńil kónshitpeidi. Sondyqtan, búgingi tańda bizdiń qyzmetkerlerimiz aldyn alý jumystaryna basa nazar aýdaryp otyr. Biylǵy jyldyń 1 qańtarynan bastap elimizde 4670 jaǵdai tirkeldi. Onyń ishinde balalardyń qyzylshaǵa shaldyǵýy 71 paiyzdy quraidy. Sońǵy aptada elimizde 450 jaǵdai tirkeldi», - deidi QR DSM Qoǵamdyq densaýlyq saqtaý komitetiniń tóraǵasy - QR Bas memlekettik sanitariialyq dárigeri Jandarbek Bekshin OKQ-da ótken baspasóz máslihatynda.
