Almaty qalasy №20 emhana bas dárigeriniń orynbasary Marjan Álieva onlain brifing barysynda «Spýtnik V» vaktsinasynyń adamdy qanshalyqty qorǵai alatynyn aitty, dep habarlaidy QazAqparat.
Onyń aitýynsha, zertteýlerge sáikes «Spýtnik V» vaktsinasynyń tiimdiligi - 91,6%.
«Bul kórsetkish «Spýtnik V» vaktsinasyn alǵan 19 866 erikti týraly málimetter negizinde jasaldy», - deidi dáriger.
Sonymen qatar ol «vaktsina alǵan adam koronavirýspen aýyrýy múmkin be?» degen saýalǵa jaýap berdi.
«Qazir osyǵan bailanysty arnaiy zertteýler júrgizilip jatyr. «Spýtnik V» vaktsinasynda immýnitet 2 jylǵa jýyq saqtalady. Bul vaktsina eki kezeń boiynsha salynady, adam alǵash ekpeni alǵan kezde kópshilik jerge shyqpaǵany jón, bul aralyqta immýnitet qalyptasady. Iaǵni bul kezde koronavirýspen aýyryp qalý qaýpi bar», - deidi Marjan Álieva.
Sonymen qatar, ol áleýmettik jelide vaktsinaǵa qatysty túrli qaýeset tarap jatqanyn tilge tiek etti.
«Emhananyń koll-ortalyǵyna vaktsina salý boiynsha turǵyndar habarlasyp, qyzǵýshylyq bildirip jatyr. Sondai-aq qoǵamda vaktsinaǵa qatysty úrei de bar. Áleýmettik jelilerde bul adamdy «chipteý» nemese onyń keri áseri bar degen maǵynada qaýeset tarap jatyr. Desek te, eresekter bul vaktsinanyń qaýipti indetti jeńýdiń jalǵyz joly ekenin biledi. Vaktsina qalypty ómirimizge oralýǵa kómektesedi», - dedi ol.
