Foto: Aqorda
Prezident Qasym-Jomart Toqaev 8-13 qyrkúiek aralyǵynda ótetin V Dúniejúzilik kóshpendiler oiyndarynyń daiyndyq barysymen tanysty, dep habarlaidy "Ult aqparat" Aqordaǵa silteme jasap.
Memleket basshysy, eń aldymen, «Astana arena» stadionyn aralap kórdi. Munda halyqaralyq sporttyq-mádeni is-sharanyń ashylý saltanaty ótedi. Otyz myń kórermen erkin syiatyn stadionǵa jyl boiy kúrdeli jóndeý júrgizildi. Qazirgi kezde abattandyrý jumystary aiaqtalyp, jabdyqtary tolyqtai jańartyldy.
Osydan keiin Qasym-Jomart Toqaevqa «Qazaqstan» jeńil atletika kesheninde ornalasqan Akkreditteý ortalyǵynyń jumysy, Kóshpendiler oiynyna qatysatyn ulttyq quramanyń kiim úlgisi tanystyryldy. Halyqaralyq is-sharaǵa 1500 erikti tartylady.
Týrizm jáne sport ministri Ermek Marjyqpaev Ulttyq quramanyń ázirligi jóninde baiandady. Onyń aitýynsha, osy ýaqytqa deiin halyqaralyq jáne respýblikalyq deńgeide 42 oqý-jattyǵý jiyny ótken. Sondai-aq sportshylar 7 halyqaralyq jáne 25 respýblikalyq týrnirge qatysqan.
Jalpy V Dúniejúzilik kóshpendiler oiyndaryna álemniń 89 elinen 2800 qatysýshy men resmi delegatsiia músheleri keledi. Saiystyń 21 túrinen 97 medal sarapqa salynady. Negizgi jarystar «Astana-arena» stadiony, «Qazanat» ippodromy, «Alaý» muz saraiy, Jaqsylyq Úshkempirov atyndaǵy Jekpe-jek saraiy, «Dýman» qonaq úi-sport kesheninde ótedi. Al jamby atý men teńge ilýge arnaiy alań jasaqtalǵan.
Halyqaralyq doda aiasynda 150-den astam mádeni is-shara josparlanǵan. Máselen, Etnoaýylda Kóshpendiler mádenieti mýzeii, qolónershiler jáne músinder kórmesi, al Ulttyq mýzeide «Kóshpendi halyq: tarih, tanym, taǵylym» atty halyqaralyq ǵylymi-praktikalyq konferentsiia uiymdastyrylady.
Aldyn ala boljamǵa sáikes, osy kúnderi elordaǵa 100 myńǵa jýyq týrist kelýi múmkin. Osyǵan orai 20-dan astam qonaq úidiń, sondai-aq týrister jii baratyn oryndardyń daiyndyǵy pysyqtalyp, qala kóshelerin abattandyrý, bezendirý jumystary qarqyndy júrgizilip jatyr.
Sondai-aq memleket basshysy at sportynan jarystar ótetin «Qazanat» ippodromyn, jamby atý jáne teńge ilý saiystary úshin arnaiy jasaqtalǵan alańdy kórdi.
