Qazaqstan Respýblikasy Mádeniet jáne sport ministrliginiń bastamasymen «JAZ ÁÝENDERI» onlain jobasy júzege asyrylýda, dep habarlaidy "Ult aqparat" Kontserttik-gastroldik qyzmet ortalyǵynyń baspasóz qyzmetine silteme jasap.
Qazaqstandyqtarǵa oblystyq kontserttik uiymdardyń úzdik kontsertteri jinaǵyn usynýǵa baǵyttalǵan atalmysh Joba aǵymdaǵy jyldyń 24 shildesi kúni Aqtóbe oblysy ónerpazdarynyń kontsertimen bastaý aldy.
Jobanyń maqsaty – álemdik koronavirýs indeti kezinde YouTube arnasy kórermenderi men qazaqstandyqtarǵa rýhani dem berý, olardy qazaqstandyq úzdik shyǵarmashylyq ujymdardyń óneri arqyly qoldaý, ulttyq qundylyqtardy nasihattaý, ónerdiń túrli janrlaryn keńinen dáripteý bolyp tabylady.
Jobany «Qazaqkontsert» memlekettik kontserttik uiymy» janyndaǵy Kontserttik-gastroldik qyzmet ortalyǵy úilestirýde.
Búgingi kúnge deiin 15 óńirdiń filarmoniiasy janyndaǵy shyǵarmashylyq ujymdardyń onlain-kontsertteri Mádeniet jáne sport ministrliginiń YouTube arnasy arqyly kórsetilip, kórermenderge usynyldy. Joba 2020 jyldyń tamyz aiynyń sońyna deiin jalǵasyp, oǵan 30-dan astam kontserttik uiymdar tartylatyn bolady.
Jobanyń júzege asyrylýy barysynda qaralym jóninen óńirlerdiń ózara básekelesýi baiqalady. Máselen, Qyzylorda, Almaty, Shyǵys Qazaqstan oblystarynyń filarmoniialary usynǵan onlain-kontsertteri kórermenderiniń belsendiligi aitarlyqtai artty.
