Biyl dástúrli «Qazaqstannyń úzdik áleýmettik jobalary» baiqaýy alǵash ret «Nur Otan» partiiasynyń jáne Eńbek jáne halyqty áleýmettik qorǵaý ministrliginiń birlesip uiymdastyrýymen ótkizildi. Oǵan elimizdiń ár óńirinen 318 avtor qatysyp, óz jobalaryn usyndy.
Marapattaý rásiminde «Nur Otan» partiiasy Tóraǵasynyń Birinshi orynbasary Máýlen Áshimbaev barlyq jobanyń jeńiske laiyq ekenin aitty. Sondai-aq ol mundai baiqaýdyń áleýmettik, rýhani jáne tárbielik mańyzy zor ekenine nazar aýdardy.
– Bul, birinshiden, áleýmettik salada belsendiligimen tanylǵan qoǵamdyq uiymdar men muqtaj jandarǵa kómek qolyn sozǵan jeke azamattarǵa qoldaý kórsetýge, olardyń eńbekterin elep-eskerýge múmkindik beretin bolsa, ekinshiden, sondai birlestikterdi kópshilikke úlgi-ónege retinde dáripteýge jol ashady. Qazirgi tańda elimizde ondai uiymdar men azamattar myńdap sanalady. Olar osyndai igi isterimen qoǵamymyzda qaiyrymdylyq mádenieti men áleýmettik jaýapkershiliktiń qalyptasýyna úlken úlesterin qosyp keledi. Sol sebepti «Nur Otan» partiiasy osy dástúrli baiqaýǵa atsalysyp, onyń jańa deńgeige kóterilýine óz septigin tigizip otyr, – dedi Máýlen Áshimbaev.
Saltanatty sharaǵa «Nur Otan» partiiasy Tóraǵasynyń Birinshi orynbasarymen birge Eńbek jáne halyqty áleýmettik qorǵaý ministri Mádina Ábilqasymova, sondai-aq basqa da memlekettik organ, biznes qaýymdastyq, úkimettik emes uiym ókilderi men Parlament depýtattary qatysty.
Baiqaý nátijesinde «Zeinetkerlerge tegin túski as» jobasymen qatysqan Rásima Temirbaeva – 1-oryn, «Arbadaǵy kedergisiz ómir» jobasymen qatysqan Nurbolat Qarabasov pen «El nazy» art-terapiiamen damytý ortalyǵy jobasymen qatysqan belgili ánshi Kenjebek Janábilov – 2-oryn jáne «Úmit sáýlesi», «Meikaton «TOM: Kazakhstan» jobalarymen qatysqan Marjan Mádieva men Sániia Arapova 3-oryn aldy.
