Foto: ashyq derekkóz
Qazaqstanda «UILI BOLAYIK» («Úili bolaiyq») degen ataýmen jumys istegen qarjy piramidasynyń qyzmeti toqtatyldy, dep habarlaidy Ult.kz.
Áleýmettik turǵyn úi baǵdarlamasy retinde kórinis tapqan bul joba shyn máninde azamattardy aldap, iri kólemde qarajat jinaǵan.
Uiymdastyrýshylar turǵyn úidi paiyzsyz bólip tóleý arqyly alýǵa bolatynyn aityp, qatysýshylardy sendirgen. Sonymen qatar, salymshylarǵa ai saiyn 15–30 paiyz kóleminde paida jáne ár tartylǵan adam úshin 10 paiyz kóleminde bonýs ýáde etilgen.
Alaida azamattardyń aqshasy qaiyrymdylyq qoryna emes, uiymdastyrýshylardyń jeke shottaryna ekinshi deńgeili bankter arqyly aýdarylǵan. Al «UILI BOLAYIK qaiyrymdylyq qorynyń» resmi esepshottary múlde qoldanylmaǵan.
Tergeý barysynda 515 adamnyń bul qarjy shemasyna aldanyp, 50 million teńgeden astam qarjy salǵany anyqtaldy. Sot sanktsiiasymen kúdiktiniń bank shottaryna tyiym salynyp, oǵan elden shyǵýǵa shekteý qoiyldy.
Qazirgi tańda is boiynsha tergeý amaldary jalǵasyp jatyr.
