Bir jerde suhbat jazylyp jatyr, ekinshi jaqta spikerler pikir almasýda. Kamerasyn daiyndaǵan tilshiler, áriptesin kezdestirgen jýrnalister, jańa jobaǵa seriktes izdegen media ókilder.
Beibitshilik jáne kelisim saraiynda tańnan beri qarbalas. Qatysýshylar tirkeýden ótip, sessiia zaldaryna asyǵyp barady. Jýrnalister spikerlerden pikir alyp úlgerýge tyryssa, túsirilim toptary tikelei qosylymǵa daiyndalyp jatyr.
Foiede áriptester júzdesip, bir-biriniń jumysyn surasyp, jańalyq bólisýde.
Kóp uzamai áńgime kásibi máselelerge aýysady: aýditoriianyń talǵamy qalai ózgerdi, jańa tehnologiialardy jumysta qalai qoldanýǵa bolady, birlesken qandai joba jasaýǵa múmkindik bar?
Mediaptaǵa dástúrli jáne tsifrlyq BAQ, baspasóz qyzmetteri, PR salasy, memlekettik organdar men kvazimemlekettik sektor ókilderi jinaldy. Qatysýshylardyń maqsaty ártúrli bolǵanymen, bárine ortaq másele bar — ózgerip jatqan aqparat keńistiginde óz aýditoriiasymen bailanysty saqtaý.
Mediaǵa senim neden bastalady?
Biylǵy forýmnyń negizgi taqyryby — «MEDIA. HUMAN. AI: 10 jyldyq transformatsiia. Senimniń jańa arhitektýrasy».
Alǵashqy kúngi talqylaýlarda jasandy intellekt pen aqparatqa degen senim máselesi qatar qozǵaldy. Neirojeli jasaǵan mátin men beineni shynaiy aqparattan qalai ajyratamyz? Tehnologiia jýrnalistiń jumysyn qanshalyqty ózgertedi? Aqparat taratý jyldamdaǵan saiyn onyń durystyǵyna kim jaýap beredi?
Plenarlyq sessiiada Qazaqstannyń Mádeniet jáne aqparat vitse-ministri Qanat Ysqaqov, Meta ókili Filip Chýa, Q.AI bas direktory Dmitrii Mýn, Euronews ókilderi jáne ózge de sarapshylar bas qosty.
Zalda otyrǵandar spikerlerdiń sózin tyńdap, mańyzdy tustaryn jazyp alyp jatty. Al úzilis kezinde sahnada aitylǵan oilar áriptester arasyndaǵy áńgimeniń arqaýyna ainaldy.
Sessiiadan keiin de jalǵasqan áńgime
Alǵashqy kúni qatysýshylar jasandy intellektini qoldanýdaǵy jaýapkershilik, jastardyń tsifrlyq qaýipsizdigi, Ortalyq Aziiadaǵy aǵylshyntildi medianyń damýy jáne birneshe tilde habar taratýdyń jańa quraldaryn talqylady.
Aqparattyń shynaiylyǵyn saqtaý máselesine de nazar aýdaryldy. Mátin, sýret pen beineni sanaýly sekýndta jasaýǵa bolatyn kezde jýrnalistiń derekti tekserýi men jariialanymǵa jaýapkershiligi burynǵydan da ózekti bola tústi.
Forýmnyń tirshiligi zaldaǵy baǵdarlamamen birge toqtaǵan joq. Dálizde qysqa suhbattar jazylyp, foiede tanystyqtar jalǵasty. Biri áriptesimen estelik sýretke tússe, endi biri aldaǵy jobanyń jaiyn talqylap jatty.
Astana Media Week 2026 Astanada 14-16 qazan aralyǵynda ótedi.
