Foto: Pexels.com
Qazaqstanǵa 3,7 million uialy telefon "sur" shemamen jetkizilgen. Memleketke tólenbegen salyq mólsheri 100 milliard teńgeni quraidy. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málimdedi, dep habarlaidy Sputnik Qazaqstan.
Úkimet otyrysynda Mýsin elge uialy telefondardy, sonyń ishinde qaitalanatyn IMEI kodtaryn ákelýdiń "sur" shemasy týraly aitty.
"Sáikestendirý kodtarynyń derekqoryna sáikes qazirgi ýaqytta elimizdiń uialy kompaniialarynyń jelisinde qaitalanatyn IMEI kody bar 3,7 million abonenttik qurylǵy jumys isteidi. Bul rette memlekettiń biýdjetine salyqtar men alymdar túrindegi túspei qalǵan soma shamamen 100 mlrd teńgeni quraidy", - dedi ol.
Aitýynsha, qaitalanatyn IMEI kody quqyq qorǵaý organdaryna urlanǵan uialy telefondardy izdeý jáne olardy buǵattaý boiynsha jedel jumysty tiimdi júrgizýge múmkindik bermeidi.
"Osy máselelerdi qolǵa alý úshin ministrlik "IMEI kodtarynyń derekqoryn" keden qyzmetteriniń júielerimen integratsiialaýdy jáne abonentterdi tirkeý kezinde biometriiany qoldanýdy josparlap otyr", - dedi Mýsin.
Aita keteri, qazirdiń ózinde Ishki ister ministrligimen birlesip, urlanǵan telefondardyń IMEI kodyn tekserýge bolady.
