Sýret: pm.kz
Birinshi vitse-premer Roman Skliar Rrimeminister.kz saityna bergen suhbatynda kádege jaratý alymyn engizý sebepterin túsindirdi. Elimiz DSU-ǵa kirgenge deiin kedendik baj salyǵy avtokólikterge 30% qurady, qarajat biýdjetke tústi.
«Qazaqstan DSU-ǵa kirý arqyly ózine mindettemeler alyp, óz naryǵyn ashty. Kedendik baj salyǵy 15%-dy qurady. Degenmen, kólik shyǵaratyn jáne kádege jaratý alymyn engizgen Resei Federatsiiasymen jáne Belarýspen birtutas ekonomikalyq keńistikte bola otyryp, biz budan qalys qala almaimyz. Olar ýtilalymyn engizdi, jaýap retinde biz de bul tólemdi engizdik. Biraq sodan keiin Ekologiialyq kodekste jeke ÓKM operatory osy janama salyqtan keletin qarajatty basqaratyn norma boldy. Jaǵdaidy 2022 jyly túzetti, qazir ekologiia jáne tabiǵi resýrstar ministrliginiń "Jasyl damý" AQ atynan memleket tikelei benefitsiar bolyp tabylady», — dedi ol.
Birinshi vitse-premer janama salyq túrinde túsetin qarajat ashyq túrde memleket pen azamattardyń qajettilikterine jumsalatynyn atap ótti. «Jasyl damý» AQ muny jyl saiyn óz esepterinde kórsetedi.
Sonymen birge otandyq avtoparkti jańartý, qaldyqtardy qaita óńdeý salasyn qalyptastyrý jáne óz óndirisin damytý boiynsha basqa da mindetter sheshilýde.
Máselen, 2022 jyly jeńildetilgen avtokredit berýge 100 mlrd teńge, avtobýs lizingine – 30 mlrd teńge baǵyttaldy. Traktorlar men kombaindardyń lizingine 2023 jyly 50 mlrd teńge bólindi.
Sonymen qatar, óńdeý salasyn qarjylandyrýǵa 265 mlrd teńge qarastyrylǵan, onyń ishinde: 185 mlrd – qaldyqtardy qaita óńdeý zaýyttaryn salýǵa, 50 mlrd teńge – QR TJM negizgi quraldaryn jańartýǵa, 15 mlrd – avtobýs lizingine, 10 mlrd – orman mekemeleri men tabiǵat qorǵaý uiymdary úshin órtke qarsy tehnikany satyp alýǵa jumsalady.
