Shetelde shyǵarylǵan jeńil avtokólikterge salynatyn ýtilizatsiialyq alym mólsheriniń 50 paiyzǵa tómendeýi Subaru markaly kólikterdiń baǵasyna oń áser etedi. «SUBARU KAZAKHSTAN» JShS direktory Aqylbek Anarbaev osyndai pikir bildirdi, dep habarlaidy QazAqparat.
«Shetelde óndirilgen kólikterge belgilengen ýtilizatsiialyq alym mólsherin 50 paiyzǵa deiin azaitý jóninde sheshim qabyldanǵanyn estidik. Biz muny oń tendentsiia dep baǵalap otyrmyz. Sebebi biz importtaityn Subaru avtokólikterine burynǵy mólsherleme boiynsha orta eseppen 1,5 mln teńge ýtilizatsiialyq alym tóleitin edik. Endi mólsherlemeni 50 paiyz tómendetse, onyń kólemi 750 myń teńge bolady. Bul bizdiń Subaru-dyń baǵasy osy somaǵa arzandaidy degen sóz. Prezident myrza «Halyq únine qulaq asatyn memleket quramyz» dep aityp jatyr ǵoi. Sol qaǵidat boiynsha halyq talabyn estip, ýtil alym mólsherin 50 paiyzǵa deiin qysqartty. Ol oń nátije beredi degen úmitimiz bar», - dedi importtaýshy kompaniianyń basshysy
Seriktestik direktory ýtilizatsiialyq alymnyń jańa mólsherleri resmi kúshine engen kúnnen bastap óz kólikteriniń baǵasy arzandaitynyna senimdi.
«Ýtilizatsiialyq alymnyń jańa mólsherlemesi qashan kúshine enetinin ázirge bilmeimiz. Resmi aqparat kútip otyrmyz. Jańa mólsherleme kúshine engennen keiin baryp «Jasyl damý» uiymyna alym tólei bastaimyz. Sodan keiin baryp bizdiń mashinalardyń baǵasy tómendeidi», -dedi Aqylbek Anarbaev.
Kei sarapshylar ýtilizatsiialyq alym ishinara azaitylǵanymen, kólik baǵasy arzandamaitynyn aityp júr.
Ýtilizatsiialyq alymnyń burynǵy mólsherlemesinen únemdelgen qarajat distribiýterdiń qaltasynda marja retinde qalatyny aitylǵan bolatyn.
Japoniialyq óndirýshiniń seriktesi ózderiniń mundaiǵa barmaitynyn aitty.
«Ondaiǵa barmaimyz. Men sizge sebebin aitaiyn. Bizdiń baǵany Japoniiadaǵy zaýyt tekserip otyrady. Ústine qosatyn marjamyzdy zaýyttyń ózi tikelei baqylap otyrady. Iaǵni, oiymyzǵa kelgen marjany qoia almaimyz. Halyq sony túsinýi kerek. Japoniiadaǵy óndirýshi álem boiynsha baǵany qadaǵalap otyrady. Mysaly, Qazaqstanda bir marja, Reseige bólek marja bolýyna jol bermeidi. Marjanyń paiyzy búkil elde birdei bolýy kerek», - dep túsindirdi «SUBARU KAZAKHSTAN» JShS direktory.
