Búgin Májilistiń jalpy otyrysynda birneshe zań jobasy qaraldy. Sonyń ishinde "2020-2022 jyldarǵa arnalǵan respýblikalyq biýdjet týraly" zańnyń jobasy da bar, dep habarlaidy Sputnik Qazaqstan.
Bilim jáne ǵylym ministri Ashat Aimaǵambetovtyń aitýynsha, úsh jyldyq biýdjette bilim salasyna qyrýar qarjyny bólý qarastyrylǵan. Al, eń bastysy, ustazdardyń jalaqysyn kóterý máselesi eskerilgen.
"Kelesi jyly 25 protsentke, odan keiin 50 protsentke, ary qarai 70 protsentke, eń sońynda 100 protsentke kóterý tapsyrmasy bar. Osy tapsyrma boiynsha tiisti qarjy qarastyryldy. Ol – bir. Ekinshiden, apatty jaǵdaida jáne úsh aýysymda jumys isteitin mektepterdi joiý boiynsha qarajat bólinip jatyr. Budan bólek, kolledjderdi jabdyqtaý, jas mamandardy qoldaý jáne basqa da baǵdarlamalar boiynsha iri kólemde qarjy berilip otyr", - dedi Aimaǵambetov jýrnalisterge bergen suhbatynda.
Ministrdiń sózine qaraǵanda, úsh jyldyq biýdjette ustazdardyń jalaqysyn kóterý sharalaryna ǵana 1,7 trillion teńge qarastyrylǵan. Buǵan deiin ondai qarjy bólinbegen.
"Endigi maqsatymyz – ol aqshany árbir pedagogqa jetkizý jáne bilim berý sapasyn kóterý. 500 myńnan astam pedagogqa san alýan qosymsha aqylar beriledi. Sosyn ǵylym salasyn qarjylandyrý kólemi eki esege artyp otyr", - dep atap kórsetti Aimaǵambetov.
Budan bólek, úsh jyldyq biýdjette mádeniet pen óner qyzmetkerleriniń jalaqysyn kóterý, turǵyn úi qoryn jańǵyrtý, mindetti áleýmettik meditsinalyq saqtandyrý, bilim salasyn jan basyna qarai qarjylandyrý, aýyldy sapaly aýyz sýmen qamtý, gazdandyrý, jergilikti joldardy damytý, jumyspen qamtý men kásipkerlikti damytý, agroónerkásip keshenin nyǵaitý, jastar men kópbalaly otbasylardy baspanamen qamtý jáne taǵy basqa mańyzdy sharalar qarastyrylǵan. Sondai-aq, "Nurly jol" men "Nurly jer" memlekettik baǵdarlamalaryna bólinetin qarajat bar. "Biznestiń jol kartasy 2025" atty jańa baǵdarlama qolǵa alynady.
Búgingi otyrysta depýtattar zań jobasyn biraýyzdan qoldady. Al spiker Nurlan Nyǵmatýlin májilistiń jalpy otyrysyna kelgen Úkimet basshysy Asqar Mamindi týǵan kúnimen quttyqtap, jumysyna sáttilik tiledi. Búgin Premer-ministr 54 jasqa keldi.
